Кавказ азадна 80 йис алатуниз талукьарна, алатай гьафтеда Махачкъалада РД-дин экономикадин ва мулкар вилик тухудай министр Гьажи Султанова «Ястреб-Каспий» СОБР-дин къуллугъдин рекьяй везифаяр тамамардайла телеф хьайибурун аялрихъ галаз гуьруьш тешкилнавай.
Жаван мугьманрихъ галаз сифте танишвал Россиядин Игит Мегьамед Нурбагьандоваз министерстводин патав хкажнавай памятникдин вилик башламиш хьана. Министрди офицердин игитвилин, саки вири дуьньядиз раиж хьайи кардикай суьгьбетна. Ахпани аялар патал министерствода экскурсия тешкилна. Министрдин кабинетда гъвечIи мугьманрихъ галаз чими ва къулай шартIара «Важиблу крарикай суьгьбетар» («Разговоры о важном») кьиле фена.
Суьгьбет Кавказ патал женгерин тарихдилай башламишна. Гь.Султанова аялриз чи уьлкве патал и женгерихъ гьихьтин метлеб авайтIа, Ватандин ЧIехи дяве кьиле фин ада гьикI дегишарнатIа, гъалибвал къазанмишун патал гьикьван четинвилер ацалтнатIа ва а женгера дагъустанвийри чпин чанарилайни гъил къачуна гьикI иштиракнатIа, гьабурукай гегьеншдаказ суьгьбетна.
— Дагъустанвияр виликдай ва гилани халис ватанпересар ва чпин Ватан хуьдайбур я. Чи уьлкведин садвал, тарих хуьн патал абуру къалурай кьегьалвилер, игитвилер, чIугур зегьметар ва и рекье давамарзавай кIвалахар чна рикIелай ракъурна виже къведач, — къейдна министрди.
Аялри министрдихъ дикъетдивди яб акална ва абур махсус презентациядихъ галаз таниш хьана. Абуру чпиз гайи суалризни жавабар гана, тарихдай чпиз малум тир делилрикай, гьакIни чпин кIелунрикай ва хуш предметрикай, рикI алай машгъулатрикай суьгьбетарна. Аялриз министерстводин кIвалахда цIийи гзаф терефрикай, гьа гьисабдай яз республикада уьмуьрдиз кечирмишзавай программайрикай ва абуру ина яшамиш жезвай агьалийрин уьмуьрдиз гьикI таъсирзаватIани чир хьана.
«Лезги газет»
