1,4 сеферда артухарнава
Дагъустанди 2023-йисуз куьлуь ва чIехи карч алай гьайванар къецепатан уьлквейриз ракъурунин кар 1,4 сеферда артухарнава. ИкI, цIинин йисуз адан кьадар, 2022-йисав гекъигайла, 46 процентдин хкаж хьанва. Идакай «Дагъустандин экономика» телеграм-каналди хабар гузва.
Россельхознадзордин делилралди, республикади къецепатан уьлквейриз 151 агъзур кьил гьайван рекье тунва. Идалайни гъейри, экспортдиз гьакIни 183 тонндив агакьнава куьлуь карч алай гьайванрин як, 2 агъзур тонн балугъар ва абурукай авунвай суьрсет ракъурнава.
Чешмеди хабар гузвайвал, республикадивай винидихъ къейднавай метягьар гзафни-гзаф маса къачузвай уьлквейрин арада Азербайжан, Иран, Тажикистан, Гуржистан, ОАЭ, Узбекистан ава.
Гьа са вахтунда Россельхознадзордин пресс-къуллугъди къейдзавайвал, экспортдиз чпин метягьар анжах ветеринариядинни санитариядин рекьяй хатасузбур яз гьисабнавай ва лазим тир ахатрмишунар тухуналди, а хатасузвал тестикьарнавай карханайри ракъурзава.
Дуьгуь михьи ийидай комплекс
Къизляр районда «Мареновский» ООО-ди дуьгуь михьи ийидай цIийи комплекс эцигун пландик кутунва. Виликамаз авунвай гьисабунралди, инвестициядин и проект уьмуьрдиз кечирмишун патал 40 миллион манат пул чара ийида. Идакай «Дагъустандин экономика» телеграм-каналди хабар гузва.
Чешмеди кхьизвайвал, карханадихъ са сятда 50 тонндив агакьна дуьгуь михьдай гужлувал жеда. ЦIийиз эцигзавай комплекс 2022-йисуз «Мареновский» ООО-ди ачухай дуьгуь михьи ийидай заводдин къурулушдик акатда.
ТIебии газ агакьарнава
Дагъустанда 2023-йисан эвел кьилелай инихъ саки 2200 кIвализ газ тухванва. Алатай йисан и муддатдив гекъигайла, и рекъем 4 сеферда гзаф я. Къейдзавайвал, и жигьетдай кьиле тухузвай кIвалахар махсус программадин («Догазификация») сергьятра аваз тешкилзава. Идакай «Газпром газораспределение Дагестан» компаниядин телеграм-каналди хабар гузва.
«Догазификация» программада иштирак авун патал гзафни-гзаф арзаяр Махачкъала, Дербент, Избербаш шегьеррай, Хасавюрт, Дербент, Къизилюрт, Ногъай районрай кьабулнава. Санлай къачурла, алай йисуз и программадин сергьятда аваз 40 километрдин мензилда газдин сетар эцигун пландик кутунва.
Чешмеди гьакIни къейдзавайвал, программа кардик акатай 2021-йисалай инихъ республикада 3,5 агъзурдав агакьна кIвалер газдалди таъминарнава.
Компаниядин пресс-къуллугъди, генеральный директор Ризван Мурадован гафарал асаслу яз хабар гузвайвал, кIвалер газдалди таъминарунин кIвалахдин йигинвал артух жезва. Агьалийрини и программадиз къвердавай гзаф итиж ийизва. Алай вахтунда кIвалер газдалди таъминарун патал 6 агъзурдалай виниз арзаяр кьабулнава, абурукай 5,8 агъзур арзадин бинедаллаз икьрарар гьазурнава.
Къалп хабар я
1-декабрдилай дидевилин капитал мад хгузвач лугьузвай ва тади гьалда сертификатрин счетрал алай пулар алудуниз эвер гузвай хабар гьакъикъатдихъ галаз кьазвайди туш. «Дагъустан» РИА-ди къейдзавайвал, и къалп хабар чукIурзавайбуру агьалийриз гьакъидихъ пул элягъунин серенжемар кьилиз акъудун теклифзава.
И кардихъ галаз алакъалу яз, ЦУР-ди Дагъустандин яшайишдин Фондунивай и хабардиз баян гун тIалабна.
Идаради къейд авурвал, им къалп малумат я ва дидевилин капитал ишлемишунин вахтунал сергьят алайди туш. Сертификатдин сагьибдивай ам вичиз кIан хьайила ва кIандай къайдада ишлемишиз жеда. Алай вахтунда и серенжем, яни дидевилин капитал гун, 2026-йисалди давамарнава.
Гьазурайди — Муса Агьмедов
