Алатай гьафтедин киш юкъуз Мегьарамдхуьруьн район арадал атайдалай инихъ 80 йис тамам хьуниз талукьарнавай шадвилин мярекатар кьиле фена. Ана Дагъустандин шегьеррайни районрай, Урусатдин жуьреба-жуьре регионрай атанвай вишералди мугьманри иштиракна. Юбилейдин мярекатар халкьдин халисан сувариз элкъвена.

14-октябрь. Экуьнин сятдин цIуд. Мегьарамдхуьре авай медениятдин макан­дин гьаятдиз кьуд патахъай инсанар къвезва. Ина муниципалитетдин гьар са хуьруь тарихдиз, адетриз, хуьрекриз талукьарнавай милли майданар кардик кутунва. Мугьманрин фикир хуьруьн майишатдин мекерадини, гьар жуьредин выс­тавкайрини желбзава. Кьиле РД-дин Гьукуматдин Председателдин заместитель Рамазан Жа­фаров, Мегьарамдхуьруьн райондин регьбер Фарид Агьмедов авай гьуьрметлу мугьманрин дестеяр хуьрерин майданрал кьелни фу гваз, манийралди къаршиламишна.

Лагьана кIанда, юбилейдин мярекатрин гьар са иштиракчидиз ина лезги халкьдин милли хуьрекрин дад аквадай, самовардин чай хъвадай мумкинвал авай. Суварин суфраяр булдалди берекатривни няметрив ацIанвай. Зуьрнедин ванцелди акъваз тийиз гуя цава кьуьлерзавай симинин пагьливанри мугьманрик руьгь кутазвай. Къейд ийин хьи, «Мегьарамдхуьруьн райондин спортдин агалкьунар» лишандик кваз арадал гъанвай майдандал эхиримжи йисара чкадин спортсменри къазанмишнавай медалри, кубокри, грамотайри, шикилри ва маса затIари чка кьунвай. Абурун арада «Леки» командадин шабагьар хкат хьана чир жезвай. ЦIи футболдай муьжуьд лагьай сеферда Дагъустандин чемпиондин тIварцIиз лайихлу хьанвай и команда вири Кьиблепатан Дагъустандин дамах я.

Мярекатдин асул пай, мугьманар теб­рик авуналди, Фарид Агьмедова ачухна. Вичин рахунра ада муниципалитетдин тарихдиз сиягьат авуна, жемиятдин уьмуьрда кьиле фейи лишанлу вакъиаяр рикIел хкана, чи йикъара авай агалкьунар, вилик акъвазнавай месэлаяр къейдна.

«Мегьарамдхуьруьн район чи Ватан патал гьакьван четин, агъур 1943-йисуз арадал гъанай. АкьалтIай пис шартIара вилик фин имтигьандиз элкъвенай. Амма зегьметкеш халкьди райондив цуьк акъудиз туна ва алай вахтунда хуьруьн майишатдин суьрсет гьасилунин рекьяй район республикада кIвенкIвечи муниципалитетрин жергеда ава.

Регион, санлай уьлкве галачиз кьилди­ са район вилик тухуз жедач. Эхиримжи­ йи­сара гьам республикадин, гьамни уьл­кведин регьберри агьалийрин яшайишдин шартIар хъсанарун патал чIехи проектар кардик кутунва. Абурун куьмекдал­ди яшайишдин цIийи объектар, рекьер, муькъвер эцигзава, аваданлувилин­ кIва­ла­­хар кьиле тухузва. И жигьетдай Да­гъус­танда кьилиз акъудзавай проектриз рес­публикадин регьбер Сергей Меликова­ кье­­тIен фикир гузва, гьикI лагьайтIа, и серенжемар вахтунда ва хъсан ери аваз ­уьмуьрдиз кечирмишунилай чкадин агьа­­лийрин яшайишдин къулайвал аслу я.

Заз мад сеферда сифте нубатда Мегьарамдхуьруьн райондин зегьметкеш халкьдиз, къенин суварик хтанвай мугьманриз, вири иштиракчийриз 80 йисан юбилей мубаракиз кIанзава. Къуй и чилел берекатарни гьуьрметар кими тахьурай», — лагьана Ф.Агьмедова.

Гуьгъуьнлай рахай Рамазан Жафарова РД-дин Кьил Сергей Меликова чкадин агьалийрин тIварцIихъ рекье тунвай Тебрикдин тел кIелна ва кьилди вичин патайни Фарид Агьмедоваз, Мегьарамдхуьруьн райондин халкьдиз 80 йисан юбилей мубаракна.

Р.Жафарова къейд авурвал, Мегьарамдхуьруьн район республикада яша­йишдин жуьреба-жуьре хилерай хъсан нетижаяр аваз вилик физвай муниципалитетрикай сад я. «Государстводин час­пардиз мукьва экIя хьанвай и райондихъ стратегиядин рекьяй еке метлеб ава. Муниципалитетди милли хатасузвал таъминарунин ва къунши уьлкведихъ галаз экономикадин рекьяй дурумлу алакъаяр хуьнин карда кьетIен чка кьазва», — лагьана вице-премьерди.

Мярекатдал мадни рахай райондин Общественный палатадин председатель Агъа­даш Нагъметуллаева муниципалитетдин бар­каллу тарихдикай итижлу суьгьбетар авуна. ФЛНКА-дин президент Васиф Гьаса­нова сувар мубарак авуналди Фарид Агьмедовав вичи регьбервал гузвай федеральный тешкилатдин патай Гьуьр­метдин грамота ва «Леки» командадиз къаюмвалзавай Рафик Агъамирзоевав грамотани 100 агъзур манатдин кьадарда авай пулдин пишкеш вахкана.

Къейд ийин хьи, юбилейдин шадвилерин сергьятра аваз халкьдин яратмишунрин «Самурдин зул» фес­тивални кьиле фена, Дагъустандин жуьреба-жуьре шегьеррайни районрай атанвай манидарри мания­р лагьана, милли кьуьлер авуна. Абурун арада Украинада кьиле физвай махсус серенжемдин иштиракчи ашукь Алиханни авай.

Рамазан Жафаровани Фарид Агьмедова Мегьарамдхуьруьн район яша­­йишдинни экономикадин рекьяй вилик финик лайихлу пай кутунвай са жерге юлдашрив республикадин государстводин ва муниципалитетдин дережадин шабагьар вахкана.

Шадвилер геждалди давам хьана. Гьа­къикъатдани, кьиле фейи мярекатар халкьдин сувариз элкъвена.

Агьмед  Магьмудов