Сентябрдин вацра Ливияда ятар акьалтуникди зиянар хьайи агьалияр патал Дагъустандай 21 тонн гуманитарный куьмек ракъурдайвал я. Идакай «ТАСС» чешмеди хабар гузва.
Дагъустандин Муфтиятди арадал гъанвай мергьяматлувилин «Инсан» фондунин векилри къейдзавайвал, мукьвара самолетда аваз ракъурдай парцик недай-хъвадай суьрсетар (чIем, гъуьр, макаронар, шекер) акатзава.
«Ливиядиз ракъурун патал 21 тонндилайни гзаф пар гьазурнава. Мусибатдин нетижада кьилел атай четинвилер алудунин жигьетдай уьлкведиз куьмек гунин макьсаддалди чна «Инсан» приложенидин куьмекдалди 1 миллион манат пул кIватIунин серенжем кьиле тухвана. Суьрсетар къе-пака рекье твада», — кхьенва фондунин малуматда.
И йисан сентябрдиз Ливияда яд акьалтунихъ галаз алакъалу яз арадал атай еке мусибатдин агьвалатдикди 11 агъзурдалай гзаф ксар кьенай, гел галачиз квахьайбурун сиягьда саки 20 агъзур кас гьатнай.
«ЛГ»
