И йикъара Махачкъалада Дагъустандин юстициядин министерстводин патав цIийиз тешкилнавай Общественный советдин (ОС) 2-заседание кьиле фена. Адан кIвалахда Дагъустандин юстициядин министрдин заместитель Рабият Закавовадини иштиракна. Заседанидал ОС-дин кIвалахдиз талукь план тестикьарна, гьакIни Общественный советдин председателдин заместитель, комиссийрин председателарни членар хкяна.
РикIел хкин, Дагъустандин юстициядин министерстводин патав Общественный цIийи советди кIвалах алай йисан 1-сентябрдилай башламишнава. Дагъустандин юстициядин министрдин заместитель Сергей Караченцеван иштираквал аваз кьиле фейи 1-заседанидал, адан членри рейсадвилелди сесер гуналди, Общественный советдин председателвиле чи ватанэгьли, профессор, РАЕН-дин член-корреспондент, общественный деятель Ислам Мурадович Мегьамедов хкяна. Общественный совет 2 йисан вахтунда кардик жеда, планрик жуьреба-жуьре месэлаяр веревирд авун, абур гьялдай рекьер жагъурун ква.
Сад лагьай месэладай рахай И.Мегьамедова ОС-дин председателдин заместителвиле сагъламвилин мумкинвилер сергьятламиш хьанвай аялриз куьмекар гудай «Жизнь без слёз» ДРОО-дин регьбер А.Гьамзаева тайинарунин теклиф гана. ИкI, ОС-дин членри, гьа гьисабдай яз и цIарарин автордини, рейсадвилелди сесер гуналди и везифаяр Айшат Агьмедбадавиевнадин хиве туна.
Р.Закавовади Дагъустандин юстициядин министерстводин экспертрин ва общественный кIвалахдикай малуматар агакьардай комиссия арадал гъунин теклиф гана. Общественный советдин председателди и теклифдин тереф хвена. ИкI, массовый информациядин такьатра Общественный советдин кIвалахдикай агьалияр хабардар авунин рекьяй комиссиядин председателвилин везифаяр и цIарарин автордин хиве туна.
Кьвед лагьай месэладай — общественный контролдин (председатель – Бегум Багандова), республикадин юстициядин министерстводи арадал гъизвай нормативно-правовой актарин проектрин общественный экспертиза авунин ва ватанпересвилин тербиядин (председатель – Бике Бакуева) рекьерай, гьакIни гражданвилин жемиятдин институтрихъ галаз кIвалахдай (председатель – Аида Керимова) комиссияр тешкилна ва абурун членар тайинарна.
Рагнеда Рамалданова
