Алатай гьафтеда Махачкъалада, Дуствилин кIвале, Кавказ патал женгера гъалибвал къазанмишна 80 йис ва Дагъустандин дишегьлийрин Союздин 30 йис тамам хьуниз талукьарнавай мярекат кьиле фена. Адан тешкилатчияр РД-дин милли сиясатдин ва динрин крарин рекьяй министерство ва Дагъустандин дишегьлийрин Союз тир. Мярекатда республикадин гьукумдин органрин, общественный тешкилатрин векилри, студентри, школайра кIелзавай аялри, гьакI къунши республикайрай атанвай мугьманри иштиракна. Адан иштиракчияр милли пек-партал алай рушари – Махачкъаладин дизайндин, экономикадин ва праводин техникумдин дизайнер-модельеррин яратмишунрин коллективди — къаршиламишна.
Дуствилин кIвалин фойеда Дагъларин уьлкведин халкьарин милли руьгь, дегь заманайрин девирар, ацукьун-къарагъун къалурзавай гъвечIи майданар тешкилнавай. Мугьманриз Дагъустандин халкьдин шаир Расул Гьамзатов дидедиз хьайидалай кьулухъ 100 йис тамам хьуниз бахшнавай экспозициядихъ ва «Игитрин папар» шикилрин выставкадихъ галаз таниш жедай мумкинвални авай.
Мярекат ачухдайла, РД-дин милли сиясатдин ва динрин крарин рекьяй министр Энрик Муслимова кIватI хьанвайбурув вичин ва Дагъустандин Кьил Сергей Меликован тIварунихъай чими келимаяр агакьарна. Ада дагъустанвийри Ватандин ЧIехи дяведа гъалибвал къазанмишуник зурба пай кутурди, 1999-йисара ва алай вахтундани къалурзавай кьегьалвилер къейд авунихъ галаз сад хьиз, Кавказ патал женгера Ватан хуьз жуьреба-жуьре миллетрин ва динрин векилар кIвачел къарагъайди рикIел хкана. Кавказ хуьн патал женгер Ватандин чIехи дяведин амай женгерилай тафаватлуди хьайиди къейдна.
Дишегьлийрин кьетIен роль къейд авунихъ галаз сад хьиз, Дагъустандин дишегьлийрин Союздин юбилейни и вакъиадихъ галаз санал кьиле тухун дуьшуьшдин кар туширди лагьана. Союздин тIварунихъ Дагъустандин Гьукуматдин Председателдин везифаяр тамамарзавай Рамазан Жафарова рекье тунвай тебрикдин чар кIелна. Гуьгъуьнлай лишанлу и вакъиа тебрик авурбурун арада Дагъустандин Общественный Палатадин Председатель А.Черкесов, РД-дин Халкьдин Собранидин Комитетдин председатель Е.Ельникова ва масабур авай.
Дагъустандин дишегьлийрин Союздин председатель Интизар Мамутаевади алатнавай йисара кьиле тухванвай кIвалахдикай суьгьбетна.
— 30 йисан девирда Союз гзаф вакъиайрин шагьид хьана, вири татугайвилериз дурум гана, мягькемдаказ кIвачел хкаж хьана, Россиядин ва Дагъустандин виридалайни чIехибурукай сад тир тешкилатдиз элкъвена, чи уьлкведин жуьреба-жуьре пипIерай тир саки 20 агъзур женсовет санал кIватIна. Чи лайихлувилериз къимет гун яз, Россиядин Президентдин указдалди Дагъустандин дишегьлийрин Союздиз Вирироссиядин общественно-государственный организациядин дережа гана. Союз гьукумдин органрин векилрихъ, женсоветрихъ, НКО-рихъ ва бизнес-сообществойрихъ галаз санал гьар жуьредин месэлаяр веревирддай ачух майдан я. Дагъустандин Кьил Сергей Меликовахъ галаз сад хьиз, гьукумдин жуьреба-жуьре дережайрин регьберриз чаз куьмекар гунай, чи теклифрин тереф хуьнай сагърай лугьуз кIанзава, — лагьана И.Мамутаевади.
Республикадин музыкадин ва яратмишунрин коллективри, артистри къалурай программади мярекатдин иштиракчийрин гуьгьуьлар мадни шадарна.
Регина Семедова
