27-29-октябрдиз Дербентда­ «ЧIе­хи бубайрин ирс» лишандик кваз пуд лагьай сеферда­ тарихдинни ватанпересвилин­ форум кьиле фида. Мярекат­ РФ-дин миллетрин крарин рекьяй Федеральный­ Агентстводин, РФ-дин Прези­дентдин па­тав миллет­рин­­ алакъай­рин­ рекьяй кардик квай Советдин, Алкьвадар Гьа­санан тIварцIихъ галай медениятдинни марифат­дин центрадин, «Урусатдин халкьарин кIвал» ФГБУ-дин куьмекдалди ФЛНКА-ди теш­килзава. Форумдин амадаг ме­дениятдин, илимдин ва образованидин хилер вилик ­ту­хунин карда куьмекзавай «Национальное Возрождение» фонд я.

ЦIи форумдин сергьятра аваз дагъвийрин руьгьдин ирсинихъ, тарихдихъ, диндихъ, акьалтзавай несилриз тербия­ гунин карда менфят къачузвай руьгьдин ивиррихъ галаз алакъа­лу месэлаяр веревирдда. Форумдин кьвед лагьай юкъуз­ диндин алим Ямин гьажи Мегьамедован «Пак Къуръандин манайрин таржума – лезги чIалал» ктабдин презентация кьиле фида, «Лезги газетдин» кьилин редактор Мегьамед Ибрагьимова Алкьвадар Гьасанан тIварцIихъ галай центрадин кIвалахрикай, проектрикай суьгьбетда. Иштиракчияр патал Алкьвадрин хуьруьз, чIехи арифдардин музейдиз, сиягьат тешкилда.

Форумдин сергьятра аваз «Про­ектная мастерская» лишандик кваз мярекатни тешкилда. Экспертри иштиракчийрихъ лезги чIал, меденият хуьнин ва вилик тухунин жигьетдай авай, тарихдихъ, ватанпересвилин тер­­биядихъ, руьгьдин ивиррихъ га­лаз алакъалу фикирар веревирдда, кар алайбурун бинедаллаз проектар гьазурда. Эгер газет кIелзавайбурун арада винидихъ къейд авунвай темайрихъ галаз алакъалу проектар аваз хьайитIа, абурукай форумдал ха­бар гуз жеда. Виридалайни хъсанбур кьилиз акъудунин карда ФЛНКА-ди куьмек гуда.

Къейд ийин хьи, мярекатда иштиракиз кIанзавайбуру ФЛНКА-дин сайтда виликамаз регистрация авуна кIанзава. Суалар пайда хьайитIа, электронный почтадин info@flnka.ru ад­ресдиз кхьиз жеда.

Чи мухбир