Алай йисан 18-сентябрдиз Дагъустандин Огни шегьердин полициядин отделдиз майишатдин метягьар авай туьквендин сагьиб-дишегьли арза гваз атана. 33 йисан яшда авай дишегьлиди ихтилат авурвал, малум тушир касди, куьлег хкягъуналди, эхиримжи варцара са шумуд сеферда туьквендин къенез гьахьна ва анай гзаф кьадарда пул чуьнуьхна.
Полициядин къуллугъчияр тахсиркардин геле къекъвена. Туьквендиз гьахьиз хьайиди виликан анин къуллугъчи тирди дуьздал акъатна. 35 йисан яшда авай итимди хиве кьурвал, ада, мумкинвал авай вахтунда, куьлегрин галгамдикай туьквендин куьлег хкудна, чуьнуьхна. Йифен вахт вилив хвена, туьквендиз гьахьна, анин экв хкудна, 10 агъзур манат пул чуьнуьхна. Вичин «кьуьруьк» регьятдаказ кьилиз акъатна акур агьалиди, иштагьар ахъа хьана, тахсиркарвал гуьгъуьнлай мад са шумудра тикрар хъувуна. Адан гьисабунралди, санлай къачурла, туьквендай ада 150 агъзур манат пул чуьнуьхна ва а такьатар вичин игьтияжриз харжна.
Тахсиркарвилин лишанриз килигна, РФ-дин УК-дин 158-статьядин «б», «в» пунктарай (угъривал) уголовный дело къарагъарнава.
«Лезги газет»
