Мергьяматлувал
Мергьяматлувилин «Адалат» фондуни СтIал Сулейманан райондин эменни тIимил ва аялар гзаф авай хизанриз куьмекзава. Ихьтин серенжемар кьилиз акъудиз гьазур тирдакай фондунин регьбер Мегьамедсалигь Ибрагьимова райондин кьил Саид Темирхановахъ галаз гуьруьшмиш хьайи вахтунда малумарна.
Регьимдин серенжемар кьилиз акъудун патал фондуниз чпин гуьгьуьлдалди 25 жегьилди куьмек гузва.
«Куьре» изданиди хабар гузвайвал, «Адалат» фондуни «Куьмекдай вахт» серенжемдин сергьятра аваз игьтияж авай хизанриз недай суьрсет ва кIвачин къапар пишкешна, гзаф аялар авай хизанар патал экскурсия ва хейлин маса мярекатар (гьа жергедай яз етим аялрин тереф хуьниз талукьбурни) кьиле тухвана. Фондунин тешкилатчийрихъ СВО-дин иштиракчийрин аялризни куьмек гудай ниятар ава.
Райондин регьбер С.Темирханова игьтияж авай хизанрин аялрин патахъай къайгъударвал авунай фондунин кьиле авайбуруз сагърай лагьана.
«Лезги газет»
