Алай йисуз карчи Къадимов Артур Абдулагьовичан хизанда шад вакъиа кьиле фена. Абурун руш Элина Артуровнади Москвадин А.И.Евдокимован тIварунихъ галай медико-стоматологиядин госуниверситетда инсандин дуркIунрин рак азардихъ галаз алакъалу тир темадай кхьей илимдин кIвалахдай кандидатвилин диссертация агалкьунралди хвена, адакай медицинадин илимрин кандидатвилин тIварцIин сагьиб хьана.
Элина Артуровна Дербент райондин К.Марксан совхозда дидедиз хана. 2012-йисуз ада ина юкьван школа къизилдин медаль къачуналди куьтягьна ва ам Москвадин А.И.Евдокимован тIварунихъ галай медико-стоматологиядин госуниверситетдик экечIна. 2018-йисуз университет яру диплом къачуналди акьалтIарна. 2018-2020-йисара Элина Артуровнади Москвадин А.С.Логинован тIварунихъ галай илимдинни тежрибадин центрада «Онколог-химиотерапевт» пешедай ординатурада вичин кIелунар давамарна ва анаг яру сертификат къачуналди акьалтIарна. Алай вахтунда чи ватанэгьлиди химиотерапевт яз Москвадин международный онкоцентрада зегьмет чIугвазва, гьа са вахтунда ада вичин пешедай докторвилин диссертациядин винелни кIвалахзава.
Элина Артуровнадин бубайрин ери-бине Кьурагь райондин Штулрин хуьряй я. Адан чIехи буба Къадимов Абдулагь Фетягьовича Дербент райондин К. Марксан совхоздин юкьван школада са кьадар йисара муаллим ва завуч яз кIвалахна. Ам «СССР-дин просвещенидин Отличник», «РСФСР-дин просвещенидин Отличник», «Дагъустан Республикадин лайихлу муаллим» тIварарин ва «Зегьметдин ветеран» медалдин сагьиб я.
Чна Элина Артуровнадиз, Къадимов Артур Абдулагьовичаз, адан хизанриз ва мукьва-кьилийриз алимвилин тIвар къачун мубаракзава. Къуй Элина Артуровнадин мурадар кьилиз акъатрай ва гележегда адахъ мадни еке агалкьунар хьурай!
Сабир Эфендиев
