Ахцегь райондин Луткунрин куьгьне хуьруьн кIунтIал алай жуьмя-мискIин халкьдин умуми такьатрихъ тамамдиз туькIуьр ва вижевайдаказ тадаракламиш хъувурдалай кьулухъ цIийи кьи­­лелай ачух хъувунва. Вичел, гуя кьвед лагьай сеферда чан хтана, къадим хуьрел такабурлудаказ хкаж хьанвай гуьзел, гьайбатлу имарат гила луткунвийриз руьгьдин къуват гузвай кьилин лишан я. 

Тарихдин метлебдин и важиб­лу вакъиадин гьуьрметдай и мис­кIинда мукьвара чIехи межлис къурмишна; саки виш йисуз гадар­наваз хьайи надир мискIиндин къу­бадилай хуьрел азандин ван акьалтна, жемятдин гуьгьуьлар ша­дарна! Луткунвийрилай гъейри, диндин мярекатда республикадин муфтиятдин векилри, районэгьлийри, Кьиблепатан Дагъус­тандин бязи районрин имамри ва теклифнавай маса мугьманри иштиракна.

Гурлу межлис (ам районда диндин таблигъат тухунин рекьяй РД-дин муфтиятдин векил Гьуьс­нидин Ашуралиева ачухна ва ус­тадвилелди кьиле тухвана) Заур Салигьова Къуръандай талукь тир дуьа кIелунилай башламишна.

– Цава гъетери хьиз, чилел мис­кIинри нур гузва. Шукур хьуй Ал­лагьдиз чаз цIийи мискIинар эцигдай, куьгьнебур туькIуьр хъийи­дай мумкинвал ганвай. Чун гьар сад «Ла илагьа иллагьагь Мугьаммадан расулиллагь» пак келимаяр мецел алаз, жуван иман мягькемариз алахъна кIанда. Чи Пай­гъам­бар (Аллагьдин патай салам ва салават хьурай вичиз) дидедиз хьайи Раби-уль-авваль варз алукьун ва бубайрин куьгьне мискIин кардик кухтуна, ина межлис кьиле­ тухун за квез, луткунвийриз, ви­ри районэгьлийриз рикIин сидкьидай мубаракзава! – лагьана­  райондин имамрин Советдин пред­седатель, Ахцегьрин жуьмя-мис­кIиндин имам Абдулашим гьажи­ Абдулгьа­шумова. Гуьгъуьнлай ада кIватI хьанвайбуруз Пайгъамбар­дин (Ал­лагьдин патай салам ва салават хьурай вичиз) уьмуьрдай гьакъикъи гьадисар ахъайна.

Заур Салигьова лазги чIалалди нашидарни назмаяр кIелайдалай кьулухъ чпин фикирар лугьун, акьалт­завай несилдиз мусурман диндин ва эдеб-ахлакьдин вязер авун патал микрофондихъ мугьманриз теклифна.

Мугьамад-Рамазан гьажи Ра­мазанов, Дагъустандин Огни шегьердин имам: – Аллагьдиз шукур хьуй чун Мугьаммад Пай­гъамбардин (Аллагьдин патай салам ва салават хьурай вичиз)  уьмметдикай авунвай! Чун Аллагьдиз икрам авун, Пайгъамбардин (Аллагьдин патай салам ва салават хьурай вичиз) теклифар – суннатар кьиле тухун патал яшамиш жезва. Гьавиляй шукур хьайи Аллагь ва Адан Пайгъамбар (Аллагьдин патай салам ва салават хьурай вичиз)   датIана рикIел хьун, зикр авун, гьатта жуван чанни къурбанд ийиз гьазур яз абур пара кIан хьун важиблу я. Эгер чаз Аллагь-Тааладин сифетарни лайихлувилер, Мугьаммад Пайгъамбардин (Аллагьдин патай салам ва салават хьурай вичиз) уьмуьр чизвачтIа, абур пара кIан жедач. Гьавиляй чириз, иман мягькемариз алахъна кIанда. Са гьадисда лугьузва: «Низ ихьтин пуд къилих аватIа, гьада имандин ширинвал гьиссда. Сад лагьайди, дуьньяда виридалайни Аллагь ва Адан расул кIан хьун. Кьвед лагьайди, Аллагьдин хатурдай масадаз рикIин сидкьидай гьуьрмет авун ва ам кIан хьун. Пуд лагьайди, динсузвилихъ элкъуьнихъай кичIевал».

Мегьамед-Расул гьажи Рамазанов, Мегьарамдхуьруьн рай­ондин Бут-Къазмайрин хуь­руьн мискIиндин имам: – Шукур хьуй Аллагьдиз чаз мис­кIин­ра санал кIватI жедай, межли­сар кьиле­ тухудай, бубайрин куьгьне­ мискIинрал чан хкидай­ мумкинвал ганвай! Инал дуьз лагьана­, чна гьарда йикъа 20 декьикьа хьайитIани Аллагь-Та­аладиз, Адан расул Мугьаммад Пайгъамбар­диз (Аллагьдин патай салам ва салават хьурай ви­чиз) талукь чирвилер къачуна кIанда, – лагьана, ада кIватI хьанвайбур мусурман диндин дибар тир Иман, Ислам, Игьсан вуч ятIа асант чIалалди гъавурдик кутуна.

Шамил  гьажи Омаров, СтIал Сулейманан районда диндин таблигьат тухунин рекьяй РД-дин муфтиятдин векил: – Чир хьун лазим я, Мугьаммад Пайгъамбар­ (Аллагьдин патай салам ва салават хьурай вичиз) себеб яз чун халкьна, дин, Къуръан гана­. Къуръанда лугьузва хьи (мана), «эгер Мугьаммад Пайгъамбар (Аллагьдин патай салам ва салават хьурай вичиз) халкьдачиртIа, За Адамни, я Женнет, Жегьеннемни халкьдачир». Шукур хьайи Аллагьди, Вичин регьимлувал яз, чаз и дуьньядин ва Эхиратдин къапуяр ахъайнава. Гьавиляй чна чи разивал малумаруналди Адаз гьамиша шукур гъун, дуьа авун лазим я…

МискIинрихъ еке нетижа ава. Абур себеб яз инсанрикай диндин стхаяр жезва. Мугьаммад Пай­гъам­барди (Аллагьдин патай салам ва салават хьурай вичиз) Меккедай Мединадиз куьч хьайила авур сифте кар – ана инсанрин стхавал мягькемарун патал мискIин эцигун хьана.

Диндин шад межлисдин эхирдай хуьруьн гьуьрметлу агъсакъа­лар тир Уьммет бубадини Жума бубади дуьа авуналди, луткунвийрин патай мугьманриз, межлисдин вири иштиракчийриз, иллаки хуьруьн жуьмя-мискIиндин имам, хуьруьн къадим мискIин туькIуьр хъувуник кьил кутуна ва и кар кьилиз акъудай Эмир гьажидиз пара кьадар сагърай лагьана. Халкьдин патай гьуьрметдин лишан-савкьат яз адаз умра ийиз Меккедиз фидай сертификат гана.

«Эхь, хуьруьн жемятдин садвал, гьуьрметлувал авачиртIа, гьел­бетда, харапIадиз элкъвенвай 1200 йисан тарих авай мискIин чавай туькIуьр хъийизни жедачир. Къуй и мискIиндал зегьмет чIугур вири ксариз и дуьньяни, Эхиратни гурай. Амин!» – алава хъувуна вичин нубатда хуьруьн имамди.

Дашдемир  Шерифалиев