Ахцегьа Гьажиагъа Ханагьмедован тIварунихъ галай куьче ава. Бязибуру «Ам вуж я?» лугьуз, хабарар кьада. Чир тахьун айиб туш (виридаз вири чир жедач), чириз алахъ тавун айиб я. Гьажиагъа Ханагьмедов Ватан патал чан гайи викIегь офицер, лайихлу кас тир. Вич Аллагьдин рагьметдик кваз хьуй! Адан экуь къамат халкьдин рикIе эбеди яз амукьда.
Ханагьмедов Гьажиагъа Хан-Агьмедович 1906-йисуз Ахцегьа савадлу хизанда дидедиз хьана. Ахцегьрин школа агалкьунралди акьалтIарай зигьинлу гадади Бакуда фялевал ийиз, инкъилабчивилин гьерекатра иштиракзава ва Бакудинни Махачкъаладин вузра пешекарвилин кьилин чирвилер къачузва.
1929-йисалай ВКП(б)-дин членди компартиядин Ахцегь райкомдин аппаратда кIвалахзава. Дагобкомдин буйругъдалди КПСС-дин Кьурагь райкомдин 1-секретарвилин везифаяр тамамарзавай ам Москвадин высший партийный курсариз рекье твазва. 1941-йисан 22-июндиз, гьайиф хьи, фашистрин Германияди хабарсуз чи Ватандал вегьена. Тарихдин вакъиадин важиблувал ва Ватандин вилик вичин буржи гьиссзавай ватанперес хва гуьгьуьллувилелди фронтдиз фена. ВикIегь дагъви офицер политрук дяведин саки лап эхирдалди къизгъин женгера хьана. Пехъи душмандин хура мягькемвал, жуьрэтлувал къалурунай командованиди адан гьунарар Ватандин дяведин 1 ва 2 лагьай дережайрин орденралди, женгинин медалралди къейдна.
Пияда аскеррин 1020-нумрадин стрелковый полкунин командир, полковник Кириченкоди ва политикадин рекьяй адан заместитель подполковник Пушинскийди 1944-йисан 9-июлдиз ганвай шабагьдин чарче ингье чи игитдикай вуч кхьенватIа:
«Пияда аскеррин 269-стрелковый дивизиядин, 1020-полкунин, 3-батальондин командирдин заместитель, капитан Хан-Агьмедов Гьажиагъади гьужумрин женгера вич уьтквем, викIегь командир ва партийно-политический кIвалахдин хъсан тешкилатчи яз къалурна. Жергедин аскерарни сержантар ва офицерар руьгьламишунин мураддалди сифте жергейра авай ада абур хсуси чешнедалди игитвилин гьужумриз къарагъарзава. ИкI, Хан-Агьмедован регьбервилик кваз Днепр вацIалай элячIунин жавабдар месэла гьялна. Маса са женгина, 1944-йисан 25-июндиз, замполитдин бажарагълу манёврдин нетижада батальонди Друть вацIун къерех хуьн патал душманди туькIуьрнавай кIеви сенгерар кукIварна, къураматдин мягькем чIук кьуна.
Гьажиагъа Хан-Агьмедован аскерар руьгьламишдай командирвилин алакьунар иллаки хъсандиз Маньки хуьр патал кьиле фейи женгина якъин хьана. Командирдихъ галаз санал подразделение гьужумдиз къарагъаруналди, абуру Манька хуьр душмандикай азад хъувуна. И женгина Хан-Агьмедовал залан хер хьана. Гуьгъуьнай хер гьеле бегьем сагъни таххьанмаз ам вичин юлдашриз куьмек яз частуниз хтана..».
1945-йисан 15-январдиз фашистрикай Варшава азад хъувунин къизгъин женгина викIегь дагъви офицер игитвилелди телеф хьана. Женгинин юлдашри ам Варшавадин патав гвай хуьре кучукна, сурухъ чкадин школадин муаллим гелкъвезва.
Дашдемир Шерифалиев
