«ЦIийиди – им хъсандиз рикIе­лай фенвай куьгьнеди я» лугьу­дай дерин манадин и келима­ къе­нин юкъузни важиблу я. И кар 17-сентябрдиз Ахцегьа ара­бист-алим Гьажикеремалидин тIва­­ру­нихъ галай медресада­ араб каллиграфиядин выс­тавка ачухуни успатна. Гьа и мед­реса­дин муаллим-каллиграф Ширин­бег гьажи Мирзоева вичин ху­шуналди­ кьил кутуна тешкилай и выставка ада Раби-уль-аввал вацран эгьмиятдиз бахш­нава, гьикI хьи, чи играми Мугьаммад пайгъамбар (Аллагьдин патай салам ва салават хьурай вичиз) гьа и вацра дидедиз хьана ва рагьметдизни фена.

Райондин ва республикадин (Да­гъустанда ихьтин выставка сиф­те яз кьиле тухузва) культу­радин уьмуьрда лишанлу вакъиадиз элкъвей кьетIен выставкадикай ха­бар хьайила, мярекатда­ чкадин­ агьалийрилай гъейри, па­тарилай­ атай мугьманрини иштиракна. Кьилди къачуртIа, абурун­ арада­ Дербентдин жуьмя-мис­кIиндин суьн­нит паюнин имам Иса­мутдин эфенди, диндин­ «Ба­буль-Абваб» университетдин ректор, алим Ариф гьажи Саидов, Дагъустандани Кеферпатан Кавказда Кавказдин мусурманрин Управленидин патай тамам ихтиярар авай векил Шагьабидин гьажи Керимов, Рутулрин жуьмя-мискIиндин имам Абдулселим гьажи Таиров ва масабур авай.

Выставкада Ширинбег гьажиди вичин, ученикар тир Давудова Зумриятан, Сардарова Гуьлярадин ва медресадин маса ученик­рин каллиграфиядин кIвалахрин санлай 40 яратмишун эцигнава. Тамашачийри абуруз еке итиж авуналди хъсан къимет гузва.

Къейд ийин, араб ва я Исламдин каллиграфия – им изобразительный искусстводин кьетIен са жуьре я. Авторри араб чIалан графикадин куфи, насх, сульс, рукья, дивани стилрин къешенг хатIаралди Аллагьдин (шукур хьуй вичиз) ва Пайгъамбарин (Аллагьдин патай салам ва салават хьурай вичиз) тIварар, пак Къуръандин сураяр, куьруь гьадисар кхьиналди Ислам дин кIанарзава, гегьеншарзава. Виликрай гьар са хуьре, медресада араб чIалан графикадин гуьзел хатIаралди кхьинардайбур — каллиграфар авай. И кар чаз къе гъилин хатIарин куьгьне ктабрай аквазва. Гила и кар цIийи кьилелай арадиз хтун тариф авуниз лайихлу я.

Мярекат, адан иштиракчиярни мугьманар хушдиз тебрикуналди, Ахцегь райондин имамрин Советдин председатель, жуьмя-мискIиндин имам Абдулашим гьажи Абдулгьашумова ачухна.

– Гьуьрметлу стхаяр, къенин адетдинди тушир мярекат чаз и пак вацра санал кIватI жедай, Ширинбег муаллимдин яратмишунрихъ галаз мукьувай таниш жедай, мусурман диндин илимдинни искусстводин рекьерай цIийи чирвилер къачудай хъсан мумкинвал я, – лагьана ада.

Нисинин капI авурдалай ва фу тIуьрдалай кьулухъ мярекатдин иштиракчияр медресадин 2-мертебадин залда ачухнавай выставкадин экспонатриз – ядигарриз тамашна. Исамутдин эфендиди, вижевайдаказ хъсан рамкайра туна цлакай куьрсарнавай гьар са шикилдин вилик акъвазиз, адал вуч ва гьихьтин стилда кхьенватIа ахъайиз, къимет гана.

­– Вичиз и рекьяй ашкъи – гьевес аваз акурла, чи теклифдалди­ Азербайжанда, Туьркияда, Юкьван Азиядин уьлквейра каллигра­фиядин рекьяй тежрибалу устад­ривай чирвилер къачуна хтай Ши­ринбег гьажи Мирзоевакай­ къе ­Да­гъустанда арабрин кал­ли­графия­дин рекьяй бажарагълу пе­­ше­кар хьанвайди выс­тавкадин кIва­­лахрай аквазва. Еке зегьмет чIугунва касди, пара кьадар сагърай! Муаллимдин кьилин агалкьун адан хъсан ученикар я кьван, Ширинбег муаллимдиз неинки диндин, гьакI каллиграфиядин жи­гьет­дайни лайихлу ученикар ава. Разивилелди къейд ийин­, араб каллиграфиядин тамам ри­кIе­лай фен­вай къадим искусст­водал гила Ахцегьа чан хквезва. Меслят хьанвайвал, Аллагьди­ гайитIа, 2024-йисан майдиз чна ина араб каллиграфиядин вири уьлкведин дережадин выставка ва конкурс кьиле тухуда, — лагьана Исамутдин эфендиди.

–  Мусурман каллиграфиядин кIвалахрин и выставка чи медресадин къайгъуйрикай малумарунин, аялрик руьгь кутунин сифте кам я. Иниз атана чи кIвалах жемятдиз раиж авунай, хъсан къимет гуналди аялар руьгьламишунай куьн пара кьадар сагърай. И йи­къа­ра чи кьве рушан каллиграфиядин кIвалахар РД-дин милли сиясатдин ва диндин крарин рекьяй министерстводи тешкилзавай конкурсдизни рекье твазва, – лагьана вичин нубатда медресадин муаллим Ширинбег гьажи Мирзоева.

Шаксуз, и выставка динэгьлийриз, каллиграфиядин рекьяй  гьевескарризни пешекарриз, гьакI художникриз итижлу я. Ам медресадин залда йисан эхирдалди давам жеда.

Дашдемир Шерифалиев