10-октябрдиз, йикъан сятдин 3-даз, Махачкъалада, тарихдин «Урусат – зи тарих» паркуна, кьуд лагьай сеферда международный дережада аваз тешкилзавай «Лезги диктант» кьиле фида.
Къейд ийин хьи, 2019-2021-йисара кьиле фейи марифатдин метлеб авай и чIехи мярекатди Урусатда, Азербайжанда, Белоруссияда, Къазахстанда, Туьркияда, Украинада, Эстонияда яшамиш жезвай агъзурралди лезгияр сад авуна. Диктант гьар йисан 10-октябрдиз тухун дуьшуьшдин кар туш: и югъ тарихда Лезги чIалан югъ хьиз гьатнава.
ЦIи «Лезги диктант» чи машгьур шаир Седакъет Керимовадин 70 йисан юбилейдихъ галаз алакъалу авунва ва диктантдин текстни адан эсеррин бинедаллаз гьазурнава.
Дагъустанда «Лезги диктант» «Лезги газетдин» редакцияди, ФЛНКА-ди, А.Гьасанан тIварцIихъ галай центради, «ЛЕКИ» фондуни тешкилзава. Диктант кьве къайдада кьиле фида: офлайн ва онлайн.
«Лезги диктант» Урусатдин жуьреба-жуьре регионрилай гъейри, лезгияр яшамиш жезвай къецепатан са шумуд уьлкведани тешкилда.
«Лезги газет»
