Мукьвара Сулейман-Стальский райондин Агъа Стlалрин Къазмайрал и хуьруьнви, общественный деятель, генерал Салман Бабаеван куьмекдалди алай аямдин мектебдин дарамат эцигунин кlвалах гатIунда. И гьакъиндай «Лезги газетдиз» Сулейман-Стальский райондин администрациядин пресс-къуллугъди хабар гузва.
Къейд ийин, цlийиз эцигдай мектебда 400 ученикдиз чка жеда. Мектеб эцигун патал хуьруьн юкьва 22047,5 квадратдин метрдин майдан авай чилин участок чара авунва. И чара авунвай чилел гьеле 1989-йисуз мектеб эцигунив эгечlнай, амма хандакlар эгъуьнайдалай кьулухъ эцигунин кар вилик фенач.
И йикъара райондин кьил Нариман Абдулмуталибоваз инвестор Салман Бабаева хайи хуьре мектеб эцигун патал такьатар чара ийиз вич гьазур тирдан гьакъиндай къейднавай чар ракъурнава.
Инвестордиз мектеб эцигунин кlвалах гежел вегьиз кlанзавач.
Райондин кьил Н.Абдулмуталибова ихьтин мергьяматлу кардик кьил кутунай Салман Бабаеваз чухсагъул малумарна.
«Лезги газет»
