Алатай гьафтеда СтIал Сулейманан райондин администрациядин дараматда алай йисан августдиз Башкириядин Уфада кьиле фейи Гатун Сурдлимпиададин (япариз зайифдаказ ван къвезвай спорстменрин) къугъунра (71 кг-дин заланвал авайбурун арада) самбодай буьруьнждин медалдиз лайихлу хьайи Рамалдан Магьарамовахъ галаз райондин кьил Саид Темирханов шад гьалара гуьруьшмиш хьана. Гуьруьшда райадминистрациядин кьилин сад лагьай заместитель Л.Оружева ва масабуруни иштиракна.
РикIел хкин, Кьасумхуьрел кардик квай ДЮСШ-да тренер, дзюдодай дуьньядин чемпион Тельман Къурбанован гъилик 4 йис тамам хьайидалай кьулухъ вердишвилер къачузвай М.Рамалданова алай йисуз кьиле фейи Россиядин чемпионатдани 3-чка кьунай. Жегьил спортсмен Кьулан СтIалдилай я.
Райондин кьили Сурдлимпиадада къазанмишнавай агалкьун тебрик авуналди, Рамалдан Магьарамоваз чухсагъулдин чар гана. Адан гъалибвилери вири районэгьлийрин руьгь хкажзавайди, абур акьалтзавай несил патал чешне тирди къейдна. Идахъ галаз сад хьиз, ватанэгьлиди спортдин виридалайни чIехи кукIушар муьтIуьгъарунихъни инанмишвал къалурна. Муниципалитетда спортдин хел вилик тухунин, гьа гьисабдай яз спортдин инфраструктура хъсанарунихъ элкъуьрнавай серенжемрикай суьгьбетна.
Жегьил спортсменди, адан 19 йис я, спортдин рекье къазанмишнавай агалкьунрикай адан тренер Тельман Къурбанова ва райадминистрациядин спортдин, туризмдин ва жегьилрин крарин рекьяй комитетдин директор Чингиз Абдулмежидова гегьеншдаказ суьгьбетна.
«Спорт. Чун саналди» лишандик кваз кьиле фейи Гатун Сурдлимпиадада дуьньядин 30 уьлкведай тир 1500 далай виниз спортсменри спортдин 21 жуьредай чпин устадвал къалурна. Россиядин хкянавай команда 1-чкадиз лайихлу хьана. Акъажунра Россиядин ва Дагъустандин хкянавай командайрик кваз иштиракай чи ватанэгьлийрикай мадни кьве кас — вичин ери-бине Луткунай тир Замир Шихамадов (тхэквондодай 80 кг-дилай гзаф заланвал авайбурун арада) — къизилдин ва Мегьарамдхуьруьн райондай тир Назим Саидов (дзюдодай 60 кг-дал къведалди заланвал авайбурун арада командайрин арада — 1 чкадиз) кьилдин зачётда гимишдин медалриз лайихлу хьана.
Регина Семедова
