Чи ватанэгьлияр – гьар сана

И мукьвара чав Санкт-Петербургда медицинадин, педагогвилин илимдин­ рекье алакьунарни агалкьунар аваз кIва­лахзавай жегьил ватанэгьлийрикай сад тир Саидмирзе Жамирзоевич Мирзаметовакай малуматар агакьна.

Ам 1992-йисан 19-майдиз Ме­гьа­рамд­­­­хуьруьн­ рай­ондин Гъепцегьрин хуь­­ре дидедиз­ хьана (бубайрин ватан Бах­цугърин хуьр я). Гъепцегь хуьруьн Т.Н.На­гъиеван тIвар­­­цIихъ галай мектеб­ тафаватлудаказ куьтягьай­ Саидмирзе 2009-йисуз С.М.Кирован тIвар­цIихъ галай воен­но-медицинский акаде­миядик экечIна. Духтурар гьазурдай факультетда кIе­лай вахтунда ада нейрохирургиядин кафедрада студентрин-курсантрин кIва­тIал­дин илимдин кружокда иштиракна ва ругуд лагьай курсуниз экъечIайла, ада вичин рикIиз гзаф хуш хиляй гележегдин пеше хкяна.

Военный ва медицинадин академия агалкьунралди куьтягьна, 2015-йисуз ам ней­рохирургиядин рекьяй ординатурадик экечIна. Ина ада неинки нейрохирургдиз, гьакI нейрореаниматологдиз ва нейрорадиологдиз герек жедай чирвилерни къачуна­.

Хкянавай рекьяй виликди финин еке ашкъи, илимдин алемдиз гьахьунин­ къаст рикIе авай жегьилди къачунвай чир­­вилер бес хьанвайбур яз гьисабнач: муьтIуьгъарна кIанзавай цIийи кукIушрив агакьун патал ада илимдин гурарин кIа­рарай винелди хкаж хьун кьетIна. ИкI, 2017-йисуз ординатура акьалтIарна, С.Мир­заметова С.М.Кирован тIварцIихъ галай военно-ме­дицинский академиядин­ нейрохирургиядин кафедрадин патав гвай аспирантура­да илимдинни тежрибадин ва педагогвилин кIвалах давамарна. 2022-йисуз ада «Неудовлетворительные исходы микрохирургической и эндоскопической поясничной дискэктомии: ана­лиз причин и прогноз» темадай агалкьунралди диссертация хуьналди, медицинадин илимрин кандидатвилин дережа къачуна.

С.Мирзаметов микрохирургиядин­ хъсан пешекаррин жергеда ава: ам кьилин­ кIарабдин, мефтIедин, юкьван тарцин, юкь­ван тарцин мефтIедин, нервийрин тIар­вилер-аза­рар сагъарунин гзаф къайдаяр чизвай­ вини дережадин нейрохирург я. Алай аямдин вилик фенвай къайдайрикай, цIийивилерикай пешекарвилелди­ менфят къачуналди, духтурди санал кIва­лах­завайбурун, вичин патав къвезвай начагъбурун патай еке гьуьрметни авторитет къазанмишнава.

Ам кьилиз, гардандиз, юкьван тарциз­, къалчахдин чанахъдиз гуьлледин ва ра­­кьун кIусарин хасаратвилер хьайи дуь­шуьш­ра эндоскопиядин хирургиядин рекьяй куьмек гудай алакьунар авай пешекар я.

Илимдин, муаллимвилин рекьени ада хъсан нетижаяр аваз кIвалахзава. Идан гьакъиндай С.Мирзаметова вич автор яз ва маса авторрихъ галаз санал кхьенвай 50-далай виниз илимдин кIвалахри шагьидвалзава.

Ам профессор И.С.Бабчинан тIвар­цIихъ­­ галай, Санкт-Петербургда кардик­ квай нейрохирургрин ассоциациядин член, С.М.Кирован тIварцIихъ галай воен­­номеди­цинский академиядин нейрохирур­гиядин ка­­федрада ВНОКС кружокдин регьбер, «Ней­рохирургия» пешедай муаллим я.

С.Мирземетован хизанда 2 гъвечIи рушаз тербия гузва. Чна ватанэгьлидихъ илимда мадни еке агалкьунар хьуник умуд кутазва.

К. Ферзалиев