РД-дин Кьилин Администрациядинни Гьукуматдин векил ва афгъанви ветеранрин советдин председатель Мегьамед Хадулаев Ахцегь райондин активдихъ галаз гуьруьшмиш хьана.
— Малум тирвал, НАТО-дин сад тир къуватар Россиядал тепилмиш хьанвайла, чи халкьдин вилик акъвазнавай виридалайни важиблу ва кьилин месэла хайи Ватандин азадвални аслу туширвал хуьн я, — лагьана «Ахцегь район» МР-дин кьил Абдул-Керим Палчаева. – Ватанпересвилин ери чи районэгьлийрин бинеда, ивида ата-бубайрилай кьулухъ ава. Валентин Эмировакайни Гьазрет Алиевакай Ватандин ЧIехи дяведин игитар хьана, вишералди рухвайриз женгинин орденарни медалар гана. Алай вахтунда райондай саки 500 касди СВО-да къуллугъзава. Энвер Набиевакай РФ-дин Игит, 6 кас жуьрэтлувилин ва гзафбур женгинин маса орденризни медалриз лайихлу хьана. Дяведиз, гьайиф хьи, къурбандарни хас я. Ватан патал чанар гайи кьегьалар халкьдин бейнида гьамишалугъ амукьда.
РД-дин регьбер Сергей Меликова кьил кутуналди, «Каспий» тIвар алаз Дагъустандин гуьгьуьллу аскеррин, викIегь дагъвийрин батальон тешкилзава. Ахцегьрин военкоматда 6 вацран ва я са йисан муддатдалди икьрар кутIуниз жеда. Ахьтин ксар дяведин къуллугъчидин хьтин, пуларалдини яшайишдин кьезилвилералди уьмуьрлух таъминарда. Абуруз дяведин частунив агакьдалди республикадай 125, РД-дин Собранидин депутат Мегьамед Алиханован патай 100 ва жувани 100 агъзур манат пулар гузва, – алава хъувуна ада.
— Исятда уьлкведи вичин вири къуватар оборонадин месэлайриз гузвайла, рухвайриз Ватан хуьниз эверзавайла, чаз, баркаллу бубайрин невеяр тир дагъвийриз, кисна ацукьдай ихтияр авач, — лагьана Мегьамед Хадулаева. — Президент Владимир Путина Дагъустандиз гьихьтин еке гьуьрмет, куьмек ийизватIа лугьун герек авач, къе ада чак, чи мумкинвилер чиз, Ватан хуьнин кардани еке умудар кутунва. Ихтибардиз вафалувилин, игитвилин чешнеяр къалурзава дагъустанвийри. «Каспий» батальондини вичин гьунар къалурда.
Гуьгьуьллубуру, 2-3 вацра хъсандиз гьазурайдалай кьулухъ, фронтдин цIарцIив агакьдалди 30-35 километрдин мензилра къуллугъда.
Ватан хуьн гьар садан буржи тирдакай райондин кьилин заместитель Роберт Гьамзаева, военный комиссар, подполковник Рафик Мегьамедова лагьана.
Дашдемир Шерифалиев
