26-сентябрдиз Москвада, Дагъустандин Гьамишалугъ векилханадин мулкарал Дагъларин уьлкведин машгьур хва, жемиятдинни сиясатдин бажарагълу деятель, са шумуд йисуз уьлкведин меркезда авай Дагъустандин векилханадиз регьбервал гайи Гьажи-Къурбан Шайдаеван экуь къамат эбеди авун патал мемориалдин кьул ачухна.
«Лезги газетдиз» РД-дин Кьилин пресс-къуллугъди хабар гайивал, мярекатда Сергей Меликова, Федерациядин Советдин Комитетдин председателдин сад лагьай заместитель Ильяс Умаханова, РФ-дин Госдумадин депутат Султан Хамзаева, РФ-дин Генпрокурордин меслятчи Сабир Къехлерова, РД-дин Гьукуматдин Председатель Абдулмуслим Абдулмуслимова, РФ-дин Президентдин патав милли алакъайрин рекьяй кардик квай Советдин член, ФЛНКА-дин Советдин председатель Ариф Керимова, ФЛНКА-дин президент Васиф Гьасанова, «Национальное Возрождение» фондунин президент Токай Керимова ва масабуру иштиракна.
Мемориалдин кьул ачухдайла С.Меликова къейд авурвал, Гьажи-Къурбан Шайдаев къанун-къайда хуьдай органрин чешнелу къуллугъчи, кар алакьдай офицер, государстводин чIехи деятель, алакьунар авай алим хьиз рикIел хкана.
«Четин тир 90-йисара Шайдаевакай РФ-дин Президентдин патав Дагъустан Республикадин сад лагьай Гьамишалугъ Векил хьана. Ада кьиле тухвай кIвалахди республикадинни федеральный гьукумдин органрин арада авай алакъаяр мягькем хьуниз таъсирна. Дипломатдиз хас ерийри, жувахъ инанмишариз жедай алакьунри, къазанмишнавай нетижадал рази тахьана мадни вилик фидай къаст хьуни Гь.-Къ.Шейдаеваз яшайишдинни экономикадин рекьяй республикада авай хейлин месэлаяр гьялдай мумкивал гана. Виридалайни кьилинди ам я хьи, гьар са карда ада гзаф агъайнадаказ тухудай…», — къейдна С.Меликова.
Дагъустандин Кьили бине СтIал Сулейманан райондин Цмуррин хуьряй тир Шайдаеврин хизандихъ Дагъустандилай къецепатани еке машгьурвал авайдакай лагьана.
«Шайдаеврин арада бажарагълу регьберар, генералар, алимар ва тарихда гел тунвай маса пешейрин сагьибар ава. Хайи хуьр авадан авунин кардик и баркаллу хизанди еке пай кутазва. Алай вахтунда Цмуррин хуьре авай хьтин мектеб, спортдин центр гьатта бязи шегьерра авач. Шайдаеври хайи хуьруьз кIвалахиз патарилай къвезвай муаллимар патал кIвалер эцигнава, жуьреба-жуьре устIарханаяр кардик кутунва, Гъалибвилин музей арадал гъанва, хуьр газдалди, хъвадай ва дигидай целди таъминарнава, рекьер туькIуьрнава… Ибур вири Шайдаеврин мергьяматлу крарин, хайи чилихъ ва ватанэгьлийрихъ авай кIанивилин нетижа я…», — алава хъувуна. С.Меликова.
Мярекатда иштиракайбурун арада Гьажи-Къурбан Шайдаеван хва Рагьман Шайдаевни авай. Ада вичин бубадин экуь къамат эбеди авунин кардик пай кутунай Дагъустандин кьилевайбуруз, куьмекар гайи вирибуруз сагърай лагьана.
Чи мухбир
