Докъузпара райондин Усугъчай, Къаракуьре, ЦIийи Къаракуьре ва Мискискарин хуьрера зирзибилар гадардай цIийи контейнерар эцигнава, хабар гузва райондин администрациядин пресс-къуллугъди.
Къейд ийин, хуьрера эцигзавай зирзибилдин къапар сенатор, карчи Сулейман Керимова район патал чара авур пулунин такьатрихъ райондин кьил Мегьамед Шамилован теклифдалди маса къачуна. Зирзибилар гадардай къапар райондин муькуь хуьрер патални маса къачудайвал я.
Жув элкъуьрна кьунвай тIебиатдин михьивал, гуьрчегвал хуьн патал амукьаяр, зирзибалар акатай гьар са чкадал гадар тавун гзаф важиблу я. И кар гьиссзавай ватанэгьлийри эхиримжи вахтара экология хуьн патал хъсан серенжемрик кьил кутазва, акьалтзавай несилдиз тIебиатдихъ галаз рафтарвал авунин къайдаяр чирзава.
Чи мухбир
