Къведай йисуз Мегьарамдхуьруьн районда яр-емиш гьялдай кархана эцигиз гатIунда
Кьиблепатан Дагъустандин багълара яр-емиш кIватI хъувунин кIвалахар худда гьатнава. 13-сентябрдиз РД-дин Гьукуматдин Председатель Абдулмуслим Абдулмуслимов государстводин патай куьмек агакьай чкадин зегьметкешрин багълариз фена. Идакай «Лезги газетдиз» РД-дин Гьукуматдин пресс-къуллугъди хабар гана.
Сифте нубатда премьер-министр 2003-йисалай кардик квай «СГИВ» ООО-дин кIвалахдихъ галаз таниш хьана. Майишатдихъ 45 гектар багъларни 400 гектар ципицIлухар ава. Ина машмашар, пIинияр, шефтелар, ичер ва маса емишар гьасилзава.
ЦIи са четинвал арадал атанва: нектариндин 150 тонндив агакьна бегьер пуч жезва. Карханадивай бегьер кьилди гьялиз жезвач, муьштерияр лагьайтIа, тIимил хьанва.
Месэла гьялун патал Абдулмуслим Абдулмуслимова энгел тавуна, республикадин яр-емиш гьялзавай карханайрин регьберарни чкадин мижеяр гьасилзавай кьилдин ксар нектариндин бегьер кIватI хъувунал, маса къачунал желб авун тапшурмишна. Къейдзавайвал, и емишдикай хъсан мижеяр хкудиз, пюреяр, мурабаяр ийиз жеда. Бегьердин са пай игьтияж авай хизанрин арада пайдайвал я.
Премьер-министрдин фикирдалди, арадал атанвай месэла тамамдиз гьялун патал чкадал яр-емиш гьялдай махсус кархана герек я.
«Йисалай-суз кIватI хъийизвай бегьердин кьадар гзаф я, анжах ам гьялдай мумкинвилер бес жезвач. И кар фикирда кьуна, къведай йисуз Мегьарамдхуьруьн районда яр-емиш гьялдай махсус кархана эцигун патал пулдин такьатар чара ийиз алахъда», — къейдна А.Абдулмуслимова.
Премьер-министрди РД-дин Гьукуматдин Председателдин заместитель Нариман Абдулмуталибовални РД-дин хуьруьн майишатдин ва недай суьрсетдин министр Мухтарбий Аджековал кархана эцигунин месэла веревирд авун, игьтияж аваз хьайитIа, инвесторни желб авун тапшурмишна.
Гуьгъуьнлай А.Абдулмуслимов «СГИВ» ООО-дин ципицIлухриз фена. Карханадихъ авай ципицIлухрин 400 гектардикай 370 гектарди бегьер гузва. 31 гектарда цIийибур кутунва. Абурун арада саперави, шатен ва каберне фран сортар ава. Алатай йисуз ина 3705 тонндив агакьна бегьер кIватI хъувуна, цIи и рекъем 4000-дав агакьун вилив хуьзва.
Къейд ийин хьи, ципицIлухра стIал-стIал яд гудай къурулуш кардик кутунва. Ина гьакIни 14 агъзур куб.м. кьадар яд гьакьзавай цин гьамбарханани ава. КIватI хъийизвай бегьер маса гун патал гьам чкадин, гьамни уьлкведин жуьреба-жуьре регионрин базарриз рекье твазва.
РикIел хкин, «СГИВ» ООО-диз багъманчивал вилик тухун патал государстводин патай 13,2 миллион манатдин кьадарда аваз пулдин куьмек ганва. Идалай гъейри, са йис вилик Росагролизингдин куьмекдалди карханади хуьруьн майишатдин техникадин са шумуд уьлчмени маса къачуна.
Агьмед Магьмудов
