ТIебиатдин къанун тирвал, йикъари гьафтеяр, гьафтейри варцар эвез ийиз, вахтуни датIана виликди еримишда. Ингье, акуна-такуна, гадни акъатна, зул алукьна. Гьам гад, гьам зул хуьруьн майишатдин карханаяр, лежбервилинни фермервилин майишатар ва арендаторар патал кIвалахрин къизгъин вахт я, абурун вилик багълара, ципицIлухра, салара агакьнавай бегьер кIватI хъувунин везифа акъвазнава.
Кьилди къачуртIа, ципицIчияр патални кIвалахар гзаф я: абур ципицIар кIватI хъувунив эгечIнава. Районда ракъинин кагьрабаяр ДаркIуш-Къазмайрин, ЦIийи Макьарин ва Эминхуьруьн карханайра, КФХ-ра ва арендадин участокра фад дигмиш жезва. И йикъара абур, районда сифтебурукай яз, ципицIар кIватI хъувунив эгечIнава.
Мукьвара чун Эминхуьруьн АСП-дин мулкарал алай Алимирзе Агъамирзоеван ципицIчивилин арендадин участокдиз фена. Чаз акурвал, хъсан къайда, михьивал авай адан 8 гектар ципицIлухра тарифдин бегьер агакьнава. А.Агъамирзоев тежрибалу ципицIчи-агроном я. Ада «Аламишинский» совхозда уьзуьмчивилин бригададин бригадир, старший агроном ва «Зардиян» ООО-да кьилин агроном яз саки 30 йисуз кIвалахна. Зегьметда къазанмишай агалкьунрай адаз 2018-йисуз «Дагъустан Республикадин хуьруьн майишатдин лайихлу работник» тIвар гана.
А.Агъамирзоеван участокда ципицIар кIватI хъувунал гьар юкъуз 10-12 кас рабочияр машгъул я. АтIай столовой сортарин ципицIар, энгелвал авачиз, муьштерийрал агакьарзава.
Яваш-яваш районда ракъинин кагьрабаяр кIватI хъувунив хуьруьн майишатдин карханаяр (ООО-яр), КФХ-ярни эгечIда.
Райондин хуьруьн майишатдин ва суьрсетдин управленидай лагьайвал, алай йисуз районда 16000 тонндилай тIимил тушиз ципицIрин бегьер кIватI хъийида.
Хазран Кьасумов
