РД-дин транспортдин ва рекьерин майишатдин министерстводин госпрограммадин сергьятра аваз, СтIал Сулейманан районда республикадин метлеб авай улакьар физвай «Кьасумхуьр-Кьурагь» рекьин 5-10 километрдин мензил цIийикIа туькIуьр хъувунва.
Къейд ийин хьи, кьве муниципалитет сад-садахъ галаз алакъалу ийизвай и рекьихъ чкадин хуьрерин экономика, яшайиш вилик финин жигьетдай еке метлеб ава.
Ремонтдин кIвалахар кьиле тухудай чIавуз винидихъ къейднавай участокда рехъ, тунар-лекъвер дуьзар хъувуна, къайдадиз хкана ва гуьгъуьнлай къир цана, марфар къвайила, яд рекье гьат тавун патал кутунвай турбаярни цIийикIа туькIуьр хъувунва.
РД-дин транспортдин ва рекьерин майишатдин министерстводин пресс-къуллугъди хабар гайивал, цIийи рекьер туькIуьрдайла, гьалдай фенвайбур къайдадиз хкидайла, улакьрин гьерекатдин хатасузвал таъминарунин месэлайриз кьетIен фикир гузва. «Кьасумхуьр-Кьурагь» рекьин бязи участокрин къерехра ракьун махсус тадаракар, улакьар гьалзавайбуру амална кIанзавай лишанар эцигнава (кьваларилай аватуникай хуьдай) ва са жерге маса крар кьилиз акъуднава.
Агьмед Магьмудов
