Мукьвара РД-дин Гьукуматдин Председателдин заместитель Нариман Абдулмуталибов милли «Самурский» парк авай гьалдихъ галаз таниш хьана ва ина познавательный туризм вилик тухун патал арадал гъизвай шартIариз къимет гана.
Паркунин умуми майданди 48273,15 гектар тешкилзава, адак Ахцегь, Докъузпара, Дербент ва Мегьарамдхуьруьн районрин тамарин мулкар акатзава.
Сифте нубатда Н.Абдулмуталибов Хтун-Къазмаяр хуьруьз мукьва яз Самурдин тама «экологиядин жигъир», «цIилерин парк», визит-центр, ял ядай махсус чкаяр, заповедникдин инспекторар ва илимдин къуллугъчияр патал дараматар эцигзавай гьалдихъ галаз таниш хьана. Вице-премьерди, машгъулардай инфраструктурадин объектар эцигдайла, цIаяр кьунин вилик пад кьунин ва анриз къведай инсанрин хатасузвал таъминарунин месэлайриз кьетIен фикир гун теклифна.
Гуьгъуьнлай Н.Абдулмуталибов милли паркунин техника, цIаяр кьур дуьшуьшра ишлемишдай алатар ва маса тадаракар авай пунктуниз, Приморский хуьре авай балугъар туьретмишзавай заводдиз фена. Ина ам Каспийскдин лососдин кIезрияр хуьзвай къайдадихъ галаз таниш хьана ва карханадин кьилевайбурухъ гележегдани балугъар туьретмишун патал герек жезвай пулдин такьатрихъ галаз алакъалу месэлаяр веревирдна.
Гегьеншдиз – РД-дин Гьукуматдин сайтдай кIелиз жеда.
Агьмед Магьмудов
