10-сентябрдиз Кьурагьа ОМОН-дин капитан Закир Султанован экуь къаматдиз бахшна мини-футболдай гьар йисуз кьиле тухун хъсан адетдиз элкъвенвай турнир 13-сеферда тешкилна. Ана Ахцегь, Докъузпара, СтIал Сулейманан, Кьурагь районрайни Дербент шегьердай тир 2011-йисуз дидедиз хьанвай ва адалай гъвечIи яшарин аялрикай ибарат 6 командади иштиракна. Идакай чаз райадминистрациядин пресс-къуллугъди хабар гана.
Къейд авун лазим я хьи, муниципалитетдин терроризмдин идеологиядиз акси программа кьилиз акъудунин сергьятра аваз кьиле тухузвай турнирдин тешкилатчи райадминистрациядин физический культурадин, спортдин ва жегьилрин крарин рекьяй отдел (начальник — Рамиз Рамазанов) я. Кьилин лозунг «Терроризмдиз — ваъ» лугьун хьиз, спортдин серенжемдин макьсадрик Закир Султанован экуь къамат эбеди авун, спорт ва сагълам уьмуьр кечирмишун пропаганда авун, аялрин арада футбол машгьурун, спортсменрин устадвал хкажун, акьалтзавай несил ватанпересвилин руьгьдаллаз тербияламишун ва масабур акатзава.
Командаяр кьве дестедиз пайна, Олимпиададин къайдада кьиле тухвай къугъунрин нетижада нянрихъ гъалибчиярни тестикь хьана. ИкI, турнирда СтIал Сулейманан райондин 1-нумрадин ДЮСШ-дин аялрикай ибарат тир командади 1-чка кьуна. Кьурагь райондин команда — 2 ва Мегьарамдхуьруьн райондин командани 3-чкайриз лайихлу хьана.
КIвенкIвечи чкаяр кьур вири командайриз кубокар, медалар, грамотаяр, спортдин рекье лазим шейэр ва пулдин пишкешар гана. ГьакIни турнирдин тешкилатчийри виридалайни хъсан къугъвай аяларни къейдна. ИкI, Рашид Бабаев ва Аким Мисриев (Кьурагь), Шихжамал Яхьяев (Мегьарамдхуьр), Казбек Рамазанов (СтIал Сулейманан район) турнирда виридалайни хъсан къугъвайбур яз гьисабна.
Гъалибчийрив пишкешар вахкуниз талукьарнавай мярекатдал Рамиз Рамазанова аялриз къазанмишнавай агалкьунар тебрикна, турнир тешкилунин ва кьиле тухунин крара куьмекар гайибуруз сагърай лагьана.
Рагнеда Рамалданова
