Алатай киш юкъуз чав чIулав хабар агакьна: залан азардикди вичин пешедин устад, респуб­ликадилай къецени, Ленинграддин областдани тIвар акъатай педагог, филолог, шаир, таржумачи Гьасанова Гуьзеля Юзбеговна (Алимурадова) рагьметдиз­ фена. Ам чидайбур ясда гьатна.

Гуьзеля 1960-йисан 16-но­­ябр­­диз Мегьарамдхуьруьн рай­ондин Тагьирхуьруьн-Къаз­май­рал ди­дедиз хьана. Ада хуьруьн юкь­­­ван школа, Дагъустандин гос­­пед­университетдин филологиядин факультет яру дипломдалди акьалтIарна.

Кьисметди ам Ленинграддин об­­­­ластдин Гатчина шегьердиз акъуд­на. Хайи ерийривай яргъа­ чкада лезги руша вичин вири къу­­ватар шегьердин 2-нумра­дин юкь­ван школада акьалтзавай несилриз урус чIалай ва литерату­радай, виридуьньядин­ ли­те­ра­ту­­радай, риторикадай де­рин чир­­­­вилер ва михьи ахлакьдин тер­бия гуниз бахшна. Ам кьилин­ дережадин муаллим, фило­ло­гиядин магистр, шегьердин школайрин филологиядин муал­лим­рин кафедрадин регьбер, РФ-дин Президентдин грантдин сагьиб тир.

Гьеле мектебда амаз, Гьаса­новадин рикI шиирар теснифунал, чIалан сирер ахтармишунал алай. Гьавиляй филологдин­ пешени хкянай. Яратмишунри­вайни къерех хьанач. Адан лезги ва урус чIаларал кхьей шии­рар жуьреба-жуьре изданийриз­ акъат­на. «Лезги газетдихъ»­ га­лазни ада алакъа хвена. КIел­дайбурув шаирдин пуд ктаб – «Мулдин цуьквер», «Булахдин чешмедал», «Гьиссерин алемда» — агакьна. Гьа са вахтунда­ ада вичин алакьунрикай, чи авторрин эсерар лезги чIалай урус чIалаз таржума ийиз, шаиррин яратмишунриз къимет гуз, гьар садан кьетIенвилер ахтармишиз, рецензияр, илимдин кIвалахар кхьидайла, менфят къачуна.

2016-йисуз ада, дуьньядин­ кьуд патаз чкIанвай ватандашар, иллаки яратмишзавай ксар, санал агудна, «Булах» кIва­­тIал ва адан фонд арадал гъана. «Булахдик» къадалай виниз ксар экечI­на ва абурун яратмишунар­ни ктабдин жилдера туна.  Адахъ мадни къени ва хъсан мурадар, планар авайди тир. Гуьзеля Юзбеговна виридаз хъсан кайвани, диде, вафалу  юлдаш, жумарт дуст хьизни чидай. Рагьмет хьурай вичиз.

«Лезги газетдин» редак­ция­­­дин коллективди насигьат­­чидин хизандиз ва мукь­ва-кьи­­лийриз, дериндай хажалат чIу­гу­нивди, башсагълугъвал гузва­.