Ейскдикай итижлу делилар
. Ейск Краснодардин крайдин виридалайни кеферпатан шегьер я. Анин умуми майдан 144 квадратный километрдикай ибарат я, 83 агъзурдав агакьна инсанар яшамиш жезва.
. Яшамиш жезвай инсанрин кьадардал гьалтайла, Ейск Кубанда вад лагьай чкадал ала.
. Азов гьуьлуьн къерехда авайвиляй Ейск курортдин шегьер яз гьисабзава.
. Ейскдин бине 1848-йисуз кутуна.
. ЧIулав гьуьлуьн сергьятра ял ядай къулай шегьерар гзаф аватIани, Ейскдиз фикир гузвай туристрин кьадар гзаф я. Ял ядайбуру Таганрогдин заливдин, Ейскдин лимандин чими цикай иллаки лезет хкудзава.
. 1777-1778-йисара алай вахтунда Ейск шегьер алай чкадал Хандин гъвечIи шегьер эцигнавай. Бязи чешмейри къейдзавайвал, ам Крымдин Шагин-Гирей хандин кьвед лагьай меркез хьун лазим тир.
. Ватандин ЧIехи дяведин вахтунда Ейск датIана немсерин авиациядин ягъунрик акатна. 1942-йисан 9-августдилай 1943-йисан 5-февралдалди душманрин гуьзчивилик хьана. И вахтунда немсерин миллетбазри гзаф шегьерэгьлияр дустагъда туна, хейлинбуруз гуьлле гана.
. Дяве акьалтIайдалай кьулухъ шегьердин ракьун рекьин вокзал, гьуьлуьн порт, яшайишдин дараматар, асул заводар ва фабрикаяр са куьруь муддатда гуьнгуьна хтуна.
. Ейскдинни Москвадин арада 1 агъзур километр ава.
. Ейскдин агьалийриз ейчанар лугьузва.
. Ейскдин къецепатан рекьера автомобилрин басрухар садрани жезвач.
. Ейскдин тIебиатдин девлетдик дармандин такьатар ква лагьайтIани жеда: йоддивни магнийдив ацIанвай гьава, гьуьлуьн яд, сагъарунин къуват авай лил хьтин кьар.
. Ейск тIвар Ея вацIухъ галаз алакъалу яз арадал атанва.
«Лезги газет»
