Дагъустанда федеральный кьезилвилер (льгота) талукь ксарин кьадар 400 агъзурдав агакьнава, абурукай 57 агъзур касди яшайишдин къуллугъар (услуги) гьакъикъи жуьреда къачузва. Ихтилат инвалидрикай, чернобылвийрикай, женгерин гьерекатрин ветеранрикай ва федеральный маса кьезилвилер талукь ксарикай физва.
1-октябрдалди абурувай кьезилвилер къачунин къайда дегишариз жеда. И кар кьилиз акъудун патал «Госкъуллугъар» порталда, республикадин Яшайишдин фондунин муьштерийрин къуллугъда ва я мукьвал алай «Зи Документар» центрада (МФЦ) талукь арза кхьин чарасуз я.
Эгер инсанди соцпакет герекзавачиз гьисабайтIа (отказ авуртIа), йисан муддатда адавай ам къачунин къайда дегишариз жедач. Пулунин жигьетдай соцпакетдин кьадар 1469 манатни 74 кепекдикай ибарат я. Абурукай дарманар ва инвалид аялриз гудай сагъардай недай затIар къачуниз 1132 манат талукьарнава.
Асул начагъвилерин вилик пад кьунин макьсаддалди санаторийра, курортра сагъарун патал 175 манат чара ийизва, шегьердин патав гвай чкайриз фин патал ракьун рекьин ва шегьеррин арайра къекъвезвай улакьра аваз сагъардай чкадал кьван финиз ва элкъвена кIвализ хтун патал – 162 манат.
Эгер квез кьезилвилер къачунин къайда гьа авайвал хуьз кIанзаватIа, арза кхьинин гереквал авач.
ИНН къачун патал
Налог гузвайдан хсуси нумра (ИНН) РФ-дин ватандашриз ва тешкилатриз гузвай документ я. Кьилди къачуртIа, ватандашриз ам ихьтин дуьшуьшра чарасуз я:
кIвалахал акъваздайла;
мажиб къачудайла;
пособияр тайинардайла;
эменни кирида вугунин, къачунин ва я маса гунин, къачунин икьрарар кутIундайла;
государстводин патай жуьреба-жуьре куьмекар къачудайла;
карчивал ва я ИП (хсуси карчивал) регистрация ийидайла;
государстводин идарайриз арза ийидайла.
Ватандашривай ИНН чпиз къулай МФЦ-дин идарадай къачуз жеда. Герек жедайди анжах паспорт я.
«Лезги газет»
