«Дагъустандин дагълух мулкар яшайишдинни экономикадин рекьяй вилик тухун»
программадин сергьятра аваз, гъвечIи теплицаяр эцигун патал мад субсидияр чара хъийидач
Мукьвара РД-дин экономикадин ва мулкар вилик тухунин рекьяй министр Гьажи Султанова «Кикунинский консервный завод» ООО-дин векилрихъ галаз гуьруьш кьиле тухвана. Абуру Дагъустандин государстводин «Дагъустандин дагълух мулкар яшайишдинни экономикадин рекьяй вилик тухун» программадин цIийи паяр арадал гъунин месэлаяр веревирдна.
«Алай вахтунда программадик дегишвилер кухтазва. Дагълух мулкар вилик тухуниз чи йикъара федеральный дережада аваз фикир гузва. Чаз куьнени и жигьетдай кьиле тухузвай кIвалахда иштиракна, адан менфятлувал артухарунин жигьетдай теклифар гана кIанзава», — лагьана Гь.Султанова.
Министр программадин сергьятра аваз кьиле фидай дегишвилерални акъвазна. Мисал яз, программадай гъвечIи теплицаяр эцигун патал субсидияр гун акъудзава, лап гзаф бегьер гудай жуьредин багълар кутун патал субсидияр къачунин къайдаярни дегишарнава.
Дагълух чкайра недай-хъвадай суьрсет гьасилун, мижеяр хкудунин карда герек къвезвай тадаракар маса къачудайла, акъатнавай харжийрин са пай эвез хъувун патал субсидияр чара авун программадик кухтадай цIийивилерикай сад хьун мумкин я.
«Кикунидин консервийрин завод кардик акат хъувуни Гергебиль, Унцукуль, Леваши, Акуша, Гуьмбет, Шамилан, Хунзах ва маса районра багъманчивал вилик финиз таъсирда», — алава хъувуна Гь.Султанова.
РикIел хкин, РД-дин Кьил Сергей Меликова ганвай тапшуругъар кьилиз акъудунин сергьятра аваз, РД-дин Гьукуматдин Председатель Абдулмуслим Абдулмуслимова «Кикунинский консервный завод» ООО-диз государстводин патай куьмек гун патал серенжемар кьабулун буйругънай.
Алай вахтунда карханади кIвалахзава. Заводда, ремонтдин кIвалахар кьиле тухвана, инженервилин коммуникацияр къайдадиз хканва. Сезондин эвел кьилера карханадиз желб авур инвестицийрин кьадар 50 миллион манатдилай алатна. Ина кIвалахдай 68 чка арадал гъанва.
Кикунидин консервиярдай заводда, августдин эхиррин рекъемралди, 735 тонн машмашар, 77 тонн шефтелар гьялнава. Къведай йисуз ина хутар, ичер ва помидорар гьялиз эгечIдайвал я.
Гуьруьшдин сергьятда аваз, «Дагъустандин дагълух мулкар яшайишдинни экономикадин рекьяй вилик тухун» программадин гьакъиндай чпин фикирар гьакIни РД-дин хуьруьн майишатдин ва недай суьрсетдин министрдин сад лагьай заместитель Шарип Шарипова, «Дагъустандин багъманчияр» Союздин генеральный директор Сайдулла Орусханова лагьана.
Агьмед Магьмудов
