ЦIийи заводра 500-дав агакьна инсанар кIвалахдай чкайралди таъминариз жеда
Дагъустанда зирзибил гьялдай цIийи пуд завод эцигун фикирдиз къачунва. Карханайри са йисан къене саки са миллион тонндив агакьна зирзибил гьялда. Алай вахтунда республикада зирзибил гадарун патал чIехи кьве полигон кардик ква. Абурни йисалай-суз ацIузва ва, са кьадар вахт арадай фейила, анриз мад зирзибил гадариз хъжедач.
Дагъустандин кьилевайбуру Урусатдин экологиядин оператордихъ (РЭО) галаз санал къанунсуздаказ жуьреба-жуьре хъуртар арадал атунин вилик пад кьун патал яшайишдин амукьаяр, зирзибил гьялдай цIийи карханаяр эцигдай къарар кьабулнава. Абур Дербент, Хасавюрт районра ва Махачкъала шегьерда эцигда.
РЭО-дин кьил Рашид Исмаилован гафаралди, цIийи комплексар алай аямдин технологийрин вири истемишунар фикирда кьуна эцигда. Гьялиз тежедай зирзибилрикай тайин макьсадра менфят къачун патал (утилизировать) абур кIватIдай махсус майданар тешкилда.
Къейд ийин хьи, исятда Къумторкъала районда ихьтин комплекс эцигзава. КIвалахрив эгечIдалди вилик экологиядин жигьетдай государстводин экспертиза кьиле тухвана. Адан нетижайрай якъин хьайивал, цIийи карханадикай чкадин «Сарыкум» заповедник патал са зарарни авач.
Рекъемрин чIалалди лагьайтIа, цIийи карханаяр эцигуниз, санлай къачурла, 15 миллиард манат пул акъатда, идакай къенин юкъуз 9 миллиард чара авунва. ЦIийи заводар къведай йисан эхирра кардик акатда. Экспертрин гьисабунралди, анра кIвалахдай 500-дав агакьна алава чкаяр пайда жеда.
Агьмед Магьмудов
