Росгвардиядин РД-да авай Управленидин къуллугъчийри кIелунин цIийи йисан вилик республикадин мектебрин гьазурлухвилин ва хатасузвал таъминарзавай гьалар ахтармишна. Кьилди къачуртIа, росгвардиячийри кьиле тухвай серенжемар мектебрин, аялрин бахчайрин, юкьван, высший, гьакIни алава чирвилер гудай кIелунин идарайрин хатасузвилин къурулуш ва терроризмдикай хуьнин гьалар ахтармишуникай ибарат тир.
Къанун-къайда хуьдай органрин къуллугъчийри сифтени-сифте сигнализация, видеогуьзчивал, махсус охрана кьиле тухузвай ксар ва бедбахтвиликай хабардай велвеладин кнопкаяр аваз хьуниз дикъет гана. Кьиле тухвай серенжемрин сергьятра аваз, чирвилер гудай идарайрай бедбахтвилин сигнал атайла, вневедомственный охранадин къуллугъчийрин кар фад кьиле тухудай гьал (оперативность) ахтармишна. Гьа са вахтунда, кьетIен гьалар арадал атайла, образованидин идарайра зегьмет чIугвазвай ксар патал абуруз чеб гьикI тухудатIа ва инсанар гьикI къутармишдатIа чирдай инструктажарни кьиле тухвана.
— Чи къуллугъчийри аялрин хатасузвал тамамвилелди таъминарун патал чирвилер гудай идарайра датIана ахтармишунар кьиле тухузва, — къейдна Росгвардиядин Дагъустан Республикада авай Управленидин вневедомственный охранадин офицер, полициядин капитан Тимур Алилова.
Къенин юкъуз Росгвардиядин территориальный управленидин подразделенийрин охранадик республикадин кIелунин 1000-далай виниз идараяр ква.
9 йис къейдна
И йикъара Дагъустандин меркезда Росгвардиядин РД-да авай Управленидик акатзавай Махачкъаладин кьилдин батальон арадал атана 9 йис тамам хьуниз талукьарнавай серенжемар кьиле фена.
Батальонда къуллугъзавайбур Кеферпатан Кавказдин военный округдин командующийдин аскервилинни сиясатдин кIвалахдин рекьяй заместитель Сергей Черноиванова тебрикна.
— Алатнавай йисара батальонда къуллугъзавай ксари, халис пешекарвал ва Ватандин вилик вафалувал къалуруналди, чпин хиве тунвай везифаяр намуслудаказ кьилиз акъудзава. Квехъ сагъвал, четин кIвалахда – къуллугъдинни женгинин везифаяр кьилиз акъудуна — агалкьунар хьурай! — алхишна генерал-майор С.Черноиванова.
Гуьгъуьнлай батальондин къуллугъчийрикай Украинада кьиле физвай махсус серенжемда тафаватлу хьайибурув государстводин шабагьар вахкана.
Рагнеда Рамалданова
