Агьалияр газдалди тамамвилелди таъминарунин месэла федеральный дережада гуьзчивилик ква. РД-дин Кьил Сергей Меликовани и жигьетдай талукь къурулушрин, муниципалитетрин вилик кIвалахар вахтунда кьилиз акъудунин везифа эцигнава.
Агьалияр тамамвилелди газдалди таъминарунин рекьяй СтIал Сулейманан районда вучтин кIвалах тухузва? И ва са жерге маса суалриз жавабар жагъурунин мураддалди чун районда кардик квай «ЖКХ ва аваданламишун» МКУ-дин директордин везифаяр вахтуналди тамамарзавай И.Э. Нежведиловахъ галаз гуьруьшмиш хьана.
– Икрам Эйзудинович, районда газдалди таъминарунин патахъай игьтияж авай инсанрин кьадар гзаф яни? И жигьетдай районда, кьилди куь управленида гьихьтин кIвалах тухузва?
— Райондин администрациядиз газдалди таъминарунин патахъай 141 арза атанва. Гзаф арзаяр атанвай хуьрерик Кьасумхуьр, Шихидхуьр, Агъа СтIалар, Агъа СтIал-Къазмаяр, Кьулан СтIал, ЦIийи Макьар акатзава. Уллу-Гъетягърин, Курхуьруьн, Испикрин, Сардархуьруьн, Бутрин, ЦIийи Мамрачрин, Ичинрин, Чуьхверхуьруьн, Вини Хъартасрин, КIварчагърин, ДаркIуш-Къазмайрин ва маса хуьрерайни сад-кьве касди арзаяр ганва. Абур вири ахтармишнава ва ЕОГ-дин (единый оператор газификации) сиягьдиз къачунва. 29 объектда газдин линияр гъунин кIвалахар акьалтIарнава. 22 объектдиз талукь документар газ ахъаюнин кIвалахар кьилиз акъудун патал СтIал Сулейманан районда авай ЭГС-диз ракъурнава.
– И программадин сергьятра аваз газ агакьнавай объектар авани?
— Авазва. Кьилди къачуртIа, Кьасумхуьрел Абдул Абдулаеван, Шамхал Бабаеван, Курхуьрел Муфрудин Эведулаеван, Герейханован 2-отделенида Имара Абакаровадин, Агъа СтIалдал Сабир Шайдаеван, Жавагьир Абдулкъафаровадин, Кьулан СтIалдал Шакир Бремован кIвалериз газ гъана. Яшайишдин кIвалериз газ гъунин месэлайрикай рахадайла, ихьтин са кардикайни лугьуз кIанзава. КIвалериз газ гъун патал кьилдин категориядин гражданриз кIвалерин къенепата эцигдай газдин тадаракар къачуниз, абур эцигуниз ва чилин участокдин къенепата газдин линия тухуниз акъатзавай харжариз са сеферда яшайишдин рекьяй куьмекдин субсидия гузва. ИкI, Ичинрин хуьряй тир Къадимов Кьасумаз 100 000 манат пул гана.
Кьасумхуьрелай тир Абакарова Маидади вичиз куьмек яз са сеферда тир 44820 манат ва Агъа СтIал-Къазмайрилай тир Насрулаева Шафигъади 100 000 манат пул гунин патахъай арзаяр ганва.
– Ихтилатрай малум жезвайвал, газ кIвалериз гъунин игьтияж авайбурун кьадар гзаф, газ гъанвайбурун кьадар тIимил я. Игьтияж авай вирибурув газ агакьарун патал гьихьтин серенжемар кьабулзава?
— Чна винидихъ лагьанай: агьалийрал тамамвилелди газ агакьарунин месэла федеральный, региондин ва муниципалитетдин дережада кьетIен гуьзчивилик ква. И жигьетдай райондин кьил Саид Темирханова кIеви истемишунар ийизва, месэла адан гьар йикъан кьетIен гуьзчивилик ква. Чи управленидини райадминистрациядин куьмек галаз тайин кIвалах тухузва. ИкI, Кьасумхуьрел, Агъа СтIалдал ва Къазмайрал, Кьулан СтIалдал, Сардархуьре – санлай райондин 15 хуьре 41 агьалидин участокрив кьван газдин линияр гъанва, и кIвалах давамарзава. И кардал субподряддин карханаяр «Факел», «Магстрой», «Газпром межрегионгаз Дербент» ООО-яр машгъул я. Вилик кумай кIвалахар акьалтIарнамазди, кIвалериз газ тухуда.
Гьелбетда, агьалияр тамамвилелди газдалди таъминарунин месэла важиблуди я. Чи «ЖКХ и Благоустройство»» МКУ-дин пешекарри и важиблувал аннамишнава ва хиве авай везифаяр кьилиз акъудун патал чалишмишвал ийизва. Идан нетижа яз, газ игьтияж авай вирибурал агакьда.
Хазран Кьасумов
