Малум тирвал, Украинада кьиле тухузвай дяведин махсус серенжемдин кьилин макьсад, коллективный Западдикай далу, даях кьуна, Россиядин халкьдиз акси миллетбазрин, цIийи фашистрин, бандерачийрин диб хкудун, Донбассдин мулкар азад авун я. И четин ва важиблу кар Россиядин Яракьлу Кьушунри яваш-яваш кьилиз акъудзава. И кардик чи ватанэгьлийрини уьтквемвилелди пай кутазва.
Абурукай сад СтIал Сулейманан райондин ДаркIуш-Къазмайрилай тир, яшар 58 йисав агакьнавай Къурбан Хизриев я. Гуьгьуьллубурун жергедай тир ада Россиядин армиядихъ галаз икьрар кутIунайдалай гуьгъуьниз гьуьлуьн пияда частуна ругуд вацра аскердиз талукь тапшуругъар тамамарна. Женгерин гьар жуьре уламрай викIегьдиз экъечIай аскер отпускдиз хтанва, ада хизанрин патав ял язава.
Вичин яшарни кваз такьуна, Ватандин гьарайдиз фенвай дирибаш хцихъ галаз СтIал Сулейманан райондин админисрациядин векилар гуьруьшмиш хьана. Анал Къ.Хизриева лагьана: «Икьрар кутIундалди вилик зун адетдин рабочий тир. Хизан хуьн патал гьар жуьре крар ийизвай. Уьлкведиз къурху гузвай кьван чIулав чIагъар-пехъер, вагьши чакъалар-жанавурар акурла, залай кIвале секиндиз ацукьиз алакьнач. Махсус серенжемда чи зурба уьлкведин вири миллетрин векилри викIегьвилелди иштиракзава. Гьар сад са игит я. Абуру миллетбазрихъ галаз жуьрэтлувилелди женг чIугвазва. Вилик эцигзавай тапшуругъар чна лазим тирвал кьилиз акъудзава. Украинадиз РагъакIидай патан саки вири уьлквейри, США-ди, Канадади куьмек гузватIани, чи кар гьахълуди я. Чун гъалибни жеда. Чи аскерри гьахъвал, азадвал, чи государстводин итижар патал женг чIугвазва»,- лагьана Къурбан Хизриева.
Хийир Эмиров
