27-августдиз Дагъустанда Кавказдин имамрин муаллим, шейх Ярагъ Мегьамедан экуь къамат рикIел хкуниз талукьарнавай мярекат кьиле фена. Адан сергьятра аваз, Дагъустандин Огни шегьердай Гуниб райондин Согратль хуьруьз кьван автопробег тешкилнавай.
Гьар йисуз кьиле физвай и мярекатди нубатдин сеферда вишералди динэгьлияр, республикадин жемиятдин, медениятдин векилар санал кIватIна.
Кьиблепатан Дагъустанда РД-дин муфтийдин векил Шамил Алиханова къейд авурвал, и мярекат себеб яз, республикадин кеферпатан ва кьиблепатан жемятрин арада авай дуствал, стхавал мягькем, цIийи танишар, хванахваяр пайда жезва.
Къейд ийин хьи, Согратль хуьре шейхдин гуьмбетдал кьил чIугурдалай кьулухъ чкадин мискIинда иштиракчийрин гуьруьш кьиле фена. Анал рахайбуру Ярагъ Мегьамеда дагъвийрин тарихда кьунвай чкадикай, халкьарин арада авай дуствилин алакъайрикай чпин фикирар лагьана.
Шейхдин сурал алай йисуз республикадин дережада аваз Къуръан хуралай кIелзавайбурун арада тухвай конкурсдин гъалибчи, Ярагъ Мегьамедан птулрикай тир Гьасан Гьамидова Къуръандин сураяр кIелна.
Агьмед Магьмудов
