ЕГЭ-дин нетижаяр

Россияда ЕГЭ вахкунин асул пай 2-июлдиз акьалтlна. “Хабарар” чешмеди малумарзавайвал, мажбури тир имтигьанрин нетижаяр ерилудаказ хъсан хьанва. Икl, урус чlалай юкьван балл 69-далай 70,93-дал кьван хкаж хьанва. Базовый математикадайни ЕГЭ-дин нетижаяр хъсанбур я. Къейдзавайвал, цlинин йисуз уьлкведа гзаф баллар къачур школьникрин кьадарни артух хьанва.

Амма Рособрнадзордин кьилин заместитель Анзон Музаева ЕГЭ-дин­ нетижаяр гьамиша хкаж хьун дуьз кар яз гьисабзавач. Адан гафаралди, эхиримжи йисара имтигьанрин нетижаяр гьа са дережада авай. “Гьамиша абур хкаж хьун вилив хвена кlандач. Исятда чун юкьван де­ре­жадив агакьнава”, — лагьана ада.

Алава премия

РФ-дин зегьметдин ва яшайишдин рекьяй хуьнин министр Максим Топилина кlвалах гузвай ксариз пlапlрус чlугун тийизвай къуллугъчийриз премияр гун теклифна. Идан гьакъиндай “Рахазва Москва” радиостанцияди малумарна.

Ада инанмишвилелди къейд авурвал, пlапlрус чlугунин танафус галачиз кlвалахзавай къуллугъчийри чпин вахт анжах кlвалахдиз серфзава. “Къурулушдин кьиле авай касдивай, премияр гудайла, и месэладиз архайинвилелди фикир гуз жеда. Ашкъиламишунин пул пlапlрус чlугван тийизвайбуруз гзаф гана кlанзава”, — лагьана министрди.

Ада алава хъувурвал, гележегда роботар кардик кутуникди кlва­лах­дин гьафтедин йикъарни тlимил хьун мумкин я, мажибар лагьайтlа, къуллугъчидин яшдив ва зегьметдин тежрибадив кьурвал хкаж хъжеда­.

М.Топилина уьлкведа бейкарвал тlимил хьанвайдакайни лагьана. Адан гафаралди, бейкарвал 4 процентдилайни агъада ава. Мажибар, министрдин гафаралди, алай йисан 4 вацран къене саки 10 процентдин хкаж хьанва.

Идалай вилик и къурулушди пенсиядиз фидалди вилик квай яшда авай россиявияр активдаказ са квел ятlани машгъул хьун патал программа туькlуьрун хиве кьунай.

Къейд ийин, 14-июндиз Россиядин премьер-министр Д.Медведева­ 2019-йисалай пенсия тайинарунин яш гьар йисуз артух хъийидайдакай малумарнай. Икl, итимар патал пенсиядиз фидай яш — 65, дишегьлияр патал 63 йис жеда. Россиядин 92 процент агьалийри  и дегишви­л­е­ри­лай кlевелай наразивалзава.

Юргъадик акатна

Японияда къати марфар къуникди инсанриз еке хасаратвилер хьана­. BBC News чешмеди малу­мар­завай­вал, 100-лайни гзаф ин­санар­ кье­на. Гел галачиз квахьнавайбурун кьадар 50-далайни гзаф я. 5-июлдилай къвайи къати марфа­ри иллаки Хи­росимадин мулкариз еке зиянар гана.

Алай вахтунда къутармишдайбурун дестеяр чан аламайбурухъ къекъвезва. Махсус къуллугъди малумарзавайвал, яд яваш-яваш тlи­мил жезва. Къутармишдайбурун дестейривай гзафни-гзаф цив ацlан­вай, уьцlенвай районар ахтармишиз жеда.

Юргъадик акатунин хаталувилик квай чкайра яшамиш жезвай 2 миллион инсандиз хатасуз чкадиз куьч хьунин буйругъ ганва.

Сенатордин гьевес хана

США-дин президент Д.Трамп ва и уьлкведин къанунар акъудзавай­бур Россиядиз акси санкцийриз мад сеферда килиг хъувун ва Россия­дин олигархриз фикир гун герек я. Идан гьакъиндай, Washington Examiner чешмеди хабар гузвайвал, инлай вилик Москвадиз фейи Америкадин сенатор Рон Джонсона малумарна.

“Куьне са вуч ятlани ийизва, амма садани ацукьна веревирдзавач”, — лагьана Джонсона. Адан гафаралди, Россиядиз акси санкцийри Америкадиз кlандайвал хъсандиз кlвалахзавач.

Къейд ийин, США-дай тир сенаторрин десте 30-июндилай 5-июлдалди Россияда хьана. Сенаторди малумарайвал, Россиядин терефдиз вичин кесердин сергьятар  гуьнгуьна хутаз кlанзава. Эгер са низ ятlани и кардиз рехъ гуз кlанзавачтlа, гужлуз рум гана кIанда.

Асланри кукIварна

ЮАР-да авай Сибуя къурухда асланри са шумуд инсан тlуьна. И къурухдин сагьиб Ник Фокса “Facebook” соцсетда хабар гайивал, а ксар къадагъа алай чкадиз носорограл гъуьрч авун патал атанвай. Къадагъа алаз хуьзвай чкадин иесиди къейд авурвал, кьведалай тlимил тушиз инсанар 2-июлдин йифен вахтунда аниз гьахьна. Тахсиркарар хъсандиз яракьламиш хьанвай ва абурув са шумуд юкъуз недай-хъвадай затlарни гвай.

Фоксан фикирдалди, вири лишанри къалурзавайвал, тахсиркаррин макьсад носорогар яна кьин ва абурун крчар вахчун тир. Гьа йикъан­ экуьнахъ къурухдин къуллугъчидиз кицlин къалабулух квай жуьредин амп ва асланар авай участокдай къалдин ван хьана. Кицl йиртижийрал элуькьайди хьиз хьана, ада и кардиз са артух фикир ганачир. Амма 2-июлдин йикъан вахтунда малум хьайивал, асланар алай чкадин патав инсандин амукьаяр ва маса шейэр гва.

Къейдзавайвал, къайдаяр чlурна, къадагъа алай чкадиз чlуру къастуналди гьахьайбур ругуд аслан яшамиш жезвай чкадиз аватна. Арадал атай дуьшуьш ахтармишун патал полициядиз эверна. “Алай вахтунда шумуд браконьер кьенватlа, малум туш. Полицияди вичин кlвалах давамарзава”, — лагьана Субиядин иеси Фокса.

Гьазурайди — Куругъли КIелетIви