Пайгъамбардин  девирда са асгьабдин уьмуьрдин юлдаш писдаказ азарлу хьана. Иштягь авачир азарлуда итимдиз вичиз  нар кIанзавайдакай лагьана. Кесибдаказ яшамиш жезвай асгьаб вичихъ амай эхиримжи пулдихъ нар къачуз базардиз фена. Нар къачуна, кефи шад яз кIвализ хквезвай адаз, ре­кьин къерехдив акъвазна, тIалабзавай къекъвераг­ акуна. “Я мергьяматлу инсан, зун и рекьив акъвазна пуд югъ я, са затIни тIуьн тавуна. Вакай са ча­ра”, — лугьуда ада. Шариатдин гъавурда авай асгьабди вичин азарлу юлдашдиз къачунвай нар къекъверагдиз гуда. Нар гуьзлемишзавай азарлудаз гила вуч лугьудатIа чин тийиз пашмандиз кIвализ хтай адаз паб кIвачел алаз акурла, ам пара тажуб жеда. Ахпа и аламат садакьадин кар тирвилин гъавурда акьада.     

Са герендилай сада абурун рак гатада. РакIар ачухайла, анихъ чина нур авай са итим гала. (Ам Ал­лагьдин патай илчи яз ракъурай малаик тир). Адан гъиле, винел пек вегьенваз, са пIатIнус авай. Атанвай  касди, пIатIнусдал алай пек алудна, лагьа­на: “И нарар ваз Аллагь-Тааладин патай садакьа я”. Месэладин гъавурда акьур асгьабди нарар гьисабна. пIатIнусда 9 нар авай. Малаикди, адаз чир же­датIа лугьуз, са нар далдаламишнавай. Гайи са­да­кьадай Аллагьди артухни алаз хгузвайди адаз чиз­вай “Заз и нарар кIандач, абур Аллагьдин патай туш. И садакьадик са нар бес жезвач”, — лугьуда кIва­­­лин иесиди. Малаикди  жибиндай нар ахкъудна­, пIатIнусдал эхцигда. Аллагьдиз шукур авуна, ас­гьаб­ди вичиз гъанвай садакьа гзаф хушвилелди  кьабулна.

Къейд ийиз кIанзава хьи, шариатда хушуналди садакьа гун инсан патал и дуьньяда ва гьамиша­лугъда гзаф менфятлу тирди рикIел хвена кIан­да. Садакьади Аллагьдихъ агъунвай инсандин малдик берекат кутада, жегьеннемдин цIай туьхуьрда­, завалрикай хуьда. Кьенвай диде-бубадиз, мукь­ва-кьилийризни садакьадикай гзаф менфят ава. Дуьа дуьздаказ кIелунни садакьа­дай я. Вири­да­лайни менфятлу садакьа етимриз куьмекар гун, же­мят патал рехъ, муьгъ туькIуь­рун, емишдин къе­­л­емар акIурун, Ислам дин патал харж авун я. Шариатда гьар са кар михьи ниятдалди авуна кIан­да. Садакьа гудайлани, ният авуна, Аллагь патал гана кIанда.

Аллагь патал гузвай суьрсетдин садакьадин ерини герек хъсанди жен. Усал еридин шей сада­кьа­дай къведач. Садакьадихъ пара, тIимил авач. Амма пара гуникай (авай касди), гьелбетда, гзаф менфят жеда. Къуй Аллагь-Таалади вирибурун садакьаяр кьабулрай, абур рикIе авай мурадрихъ агакьрай!

Рагьидин Эминов