Лайихлу ватанэгьлийрикай чал мукьвал-мукьвал хъсан хабарар агакьзава. Чпин алакьунар, агалкьунар ва лайихлувилер себеб яз, чаз абур алай чкани чир жезва.
И мукьвара сад лагьай каналди къалурзавай Елена Малышевадин нубатдин “Здоровье” передачада иштиракай тlвар-ван авай хирург Эмирбег Абдулкеримович Эмирбегов чи ватанэгьли я. Передачадай малум хьайивал, балкlанди кlвачеривди чин ягъуникди реанимациядиз аватай са жегьил сагъар хъувун патал Эмирбега кьетlен жуьредин операция кьилиз акъудна. Пешекар хирургди жегьил гададин ханвай кlарабрин кlусар чкайрал эхцигна, адан чин тамамвилелди адетдин къайдадиз хкана.
“Facebook.com” соцсетда авай “Лекьермакан” чини малумарайвал, Эмирбегован ери-бине Докъузпара райондай я. Ам 1981-йисуз Махачкъалада Абдулкерим Ашурбеговичан ва Къизилгуьл Магьарамовнадин хизанда дидедиз хьана. Жегьил духтурдин буба Докъузпара райондин (гила Мегьарамдхуьруьн райондин) Гъепцегьрин хуьряй ва диде Усугъчайдилай я.
Эмирбег Эмирбегова 1998-йисуз Махачкъала шегьердин 19-нумрадин мектеб куьтягьна, 2000-йисуз ам Санкт-Петербургда авай С.М.Кирован тlварунихъ галай ВМедА-дик экечlна, 2006-йисуз вуз куьтягьна. Медицинадин академияда ада хирургиядай интернатурани акьалтIарна.
2007-2009-йисара Эмирбег Абдулкеримовича СКВО-да къуллугъна. Яракьлу кьушунрин жергедани ада вич алакьунар авай аскер тирди къалурна. Ам Гуржистан мажбуридаказ ислягьвилин рекьел хкунин гьерекатрин иштиракчи хьана. Гуьгъуьнлай адаз РФ-дин Верховный Главнокомандующийдин грамотани гана.
2009-йисалай 2011-йисал кьван ада Санкт-Петербургдин И.П.Павлован тlварунихъ галай медицинадин госуниверситетда рекъверинни чинин хирургиядин ва хирургиядин стоматологиядин кафедрада клиникадин ординатурада кlвалахна.
Машгьур ватанэгьлиди 2011-йисалай Санкт-Петербургда К.А. Раухфусан тlварунихъ галай 19-нумрадин аялрин азарханада рекъверинни чинин хирург яз кlвалахзава. Ина вичин алакьунар къалурай Эмирбег Эмирбеговал 2016-йисуз азарханадин регьберди рекъверинни чинин хирургиядин отделенидин заведующийдин къуллугъ ихтибарна.
2010-йисуз ада Санкт-Петербургдин стоматологиядин институтда хирургиядин стоматологиядин рекьяй пешекарвилин дережа хкажна. Ватанэгьлиди вичин алакьунар, чирвилер мадни гегьеншарун патал алай вахтунда аспирантурада кlелзава ва медицинадин илимрин кандидатвилин дережа къачун патал диссертациядин винел кlвалахзава.
Эмирбег Абдулкеримович Санкт-Петербургдин медицинадин илимдин стоматологрин обществодин член, гьамиша илимдиз итиж ийизвай, кьакьан дережадин пешекар я. Адахъ мадни зурба агалкьунар хьурай!
Куругъли Ферзалиев
