Росгвардиядин Дагъустан Респуб­ли­када авай Управлениди (куьрелди — Рос­гвардия) къуллугъчийрин гьар йикъан­ кьи­лин везифайрик акатзавай общест­венный къайдаяр хуьнилай, терроризмдин вилик пад кьунилай, махсус, гьа гьи­сабдай яз республикада кьиле физвай терроризмдиз акси серенжемра ва яракьрин оборотдал гуьзчивал тухунин карда иштиракунилай, агьалийрин эменни хуьнилай (ва икI мад) гъейри, зи фикирдалди, винидихъ къейднавайбурулай тIимил важиблувал авачир мадни са месэладиз — аялар, жаванар, санлай акьалтзавай несил ватанпересвилин руьгьдаллаз тербияламишуниз ва сагъламбур яз чIехи хьуниз артух фикир гузва.

Алай вахтунда Украинада кьиле физвай махсус серенжемда Дагъларин уьлкведин аскеррини офицерри, игитвал къалуриз, жуьрэтлувилелди женг чIугвазва, чандилайни гъил къачуна, гъалибвилер къазанмишзава. Женгчийриз регьятзавач, амма дагъвийри дурумлувал, кьегьалвал, ватанпересвал къалурзава. МасакIа хьунни лазим туш. Ватандин итижар хуьз алакьдай, гьам руьгьдин ва гьамни бедендин сагъламвал авай кьегьалар инлай кьулухъни хьун патал абур къемаз, гъвечIизмаз тербияламишна кIанда. Росгвардиядин Дагъустан Республикада авай Управленидин кьиле авай ксари и месэлаяр, кIевелай аннамишна, важиблу амай масабурухъ галаз сад хьиз, гьар йикъан гуьзчивилик кутунва. Инал лугьун лазим я хьи, жергедин къуллугъчийри спортдин серенжемра чпини мукьвал-мукьвал иштиракзава, хъсан нетижаярни къазанмишзава, гьакI жегьилрин устадвал хкажуникни чпин пай кутазва.

ИкI, са шумуд югъ идалай вилик, «Росгвардия! Гъалибвилерихъ виликди!» лишандик кваз, Каспийскда Олимпиададин резервдин «Лидер» спортшколада полициядин сержант, боксдай Россиядин чемпион, Вирироссиядин ва рес­публикадин акъажунринни турниррин са шумудра чемпион, гьакIни ведомстводи комплексный единоборствойрай, кикбоксингдай, гъилералди кукIунай кьиле тухвай акъажунрин гъалибчи Арслан Мусаева жаван спортсменар патал мастер-класс къалурна. Сифтедай ада жаванрихъ галаз разминка кьилиз акъудна, ахпа боксдин вичин рикI алай са шумуд къайдадин сирер ачухна.

— Тамам 12 йис идалай вилик зун сифте­ яз и залдиз атанай. Зи спортдин уьмуьрдин рекьин эвел ина башламиш хьана. Тайин агалкьунрихъ агакьун патал сифте нубатда сабурлувал, мадни, че­тин­ви­лериз дурум гуналди, зегьмет чIу­гуна кIанда. Зун инанмиш я, намуслу­даказ зегь­мет чIугуни куьнни спортдин чIехи ку­кIушрихъ тухуда, уьмуьрдани квехъ агалкьунар жеда, — къейдна Арслан Мусаева.

Спортдихъ галаз алакъалу пай акьал­­­тIайла, Росгвардиядин къуллугъчиди  вичин гьар йикъан кIвалахдикай, жаванриз Ватандикай, ватанпересвиликай суьгьбетна.

Спортшколадин высший категориядин тренер Мегьамед Жафарова мугьмандиз сагърай лагьана.

Винидихъ къейднавай месэлайриз талукьарна, алатай гьафтеда,  «Росгвардия­дихъ галаз каникулар» серенжемдин сергьятра аваз, полициядин старший сержант, боксдай Россиядин чемпион ва комплексный единоборствойрай Дагъустандин чемпион Ибрагьим Жаватханов Буйнакский райондин кIелунинни тренировкайрин «Патриот» лагерда ял язавай аялрихъ галаз гуьруьшмиш хьана. Адет тирвал, зарядкадилай, боксдай мастер-классдилай гъейри, ада аялриз Калашни­­кован автомат чукIурунин ва кIва­тунин къайда къалурна. Мадни аялриз автоматдин макет арадал гъидай мумкинвал гана­.

Серенжемдин кьвед лагьай паюна И.Жаватханова милли гвардиядин кьушунрикай ва ведомствода къуллугъзавайбурун вилик акъвазнавай месэлайрикай суьгьбетна, жаванрин са жерге суалриз жавабар гана.

Эхирдай лагердин кьиле авай ксари чи ватанэгьлидиз спортдин сирер ачухунай ва маналу суьгьбетрай сагърай лагьана. Ихьтин гуьруьшрихъ, жаванар ватанпересвилин руьгьдаллаз тербиялами­шунал гьалтайла, еке метлеб авайди­ къейд авунихъ галаз сад хьиз, абур датIана кьиле тухун лазим тирдал фикир желбна.

Чна винидихъ къейд авурвал, Рос­гвардиядин Дагъустан Республикада­ авай Управленидин къуллугъчийри спорт­­дин рекьяй чпини устадвал хкажза­ва, спортдин серенжемра чпини агалкьунралди иштиракзава. ИкI, Махачкъалада, А.М.Мирзабегован тIварунихъ галай женгинин искусствойрай Дагъустандин госцентрада, Кеферпатан Кавказдин хкянавай командадин сбор кьиле фена. Тамам кьве гьафтеда округдин хкянавай командадин спортсменри майор Индрис Тлупован регьбервилик кваз комплексный единоборствойрин жуьреба-жуьре къайдайрай чпин устадвал хкажна, абурун сирер чирна,  гьакIни спортдин и жуьредай РФ-дин милли гвардиядин кьушунрин чемпионатдин вилик (ам 22-25-августдиз Кисловодскда кьиле фида) гьазурвал акуна.

— Республикадин хкянавай командадик тIвар-ван авай спортсменар, международный классдин спортдин мастерар, ведомстводин ва жуьреба-жуьре дережайрин акъажунрин гъалибчияр ва призерар ква. Комплексный единоборствойрай Росгвардиядин Дагъустан Республикада авай Управленидин къуллугъчийри уьлкведин милли гвардиядин кьушунрин чемпионатра кIвенкIвечи чкаяр  виликдайни кьуна, исятдани абурук еке умудар кутунва, — къейдна И.Тлупова.

22-августдиз, Россиядин Федерация­дин Гьукуматдин пайдахдин юкъуз, Рос­гвардиядин Дагъустан Республикада авай Управленидин къуллугъчийри ватанпересвилин «Россиядин триколор» серенжемдани иштиракна.

РикIел хкин: 1991-йисан 22-августдиз Москвада Лацу кIвалин къавал сифте сефер яз (официальный къайдада) мукални кIута алай яру пайдахдин чкадал, Россиядин ярж яз, пуд рангунин цIийи пайдахди лепе гана. 1994-йисан 20-августдиз РФ-дин Президентдин Указдалди 22-август Россия­дин пайдахдин югъ яз тайинарна.

«Россиядин триколор» серенжемдин тешкилатчи «Волонтеры Победы» Вирироссиядин жемиятдин гьерекатдин Да­гъустандин отделение тир. Адан сергьятра аваз, тIвар кьунвай гьерекатдин волонтерри жаван армейцийрихъ ва Россиядин аялринни жаванрин «Движение первых» гьерекатдин иштиракчийрихъ галаз санал росгвардиячийриз триколордин лентер пайна,суварин тарихдикай, ватанпересвиликай суьгьбетна.

— Россиядин пайдах — им аслу тушир, вичихъ девлетлу ва баркаллувилин адетар авай чи зурба уьлкведин ярж я. Къе и пайдах гваз чи аскерри ва офицерри Ватандин итижар хуьзва, чи чIехи ва ата-бубайри къалурай игитвилерин  паквал хуьзва. Чи везифа акьалтзавай несилар ватанпересвилин руьгьдаллаз, рикIе Ватандихъ кIанивал аваз чIехи авуникай ибарат я, — къейдна  Росгвардиядин Дагъустан Республикада авай Управленидин начальникдин аскервилинни сиясатдин кIвалахдин рекьяй заместитель Башир Алимова.

Рагнеда Рамалданова