И йикъара Дербентда Махачкъаладин футболдин «Динамо» клубдин (ФК) кьилин тренер Къурбан Бердыеван регьбервилик кваз Кьиблепатан Дагъустанда аялрин футбол вилик тухуниз талукьарнавай семинар-совещание кьиле фена. Ана Кьиблепатан Дагъустандин саки вири районрин спортдихъ галаз алакъалу хиле зегьмет чIугвазвай ксари, гьа гьисабдай яз тренерри-муаллимри иштиракна. СтIал Сулейманан райондай семинар-совещанидиз администрациядин спортдин, туризмдин ва жегьилрин крарин рекьяй комитетдин директор Чингиз Абдулмежидов, 1-нумрадин ДЮСШ-дин тренерар-муаллимар тир Агьмедагъа Саидагьмедов ва Абдулазиз Гьажиагьмедов рекье тунвай. Идакай чаз райадминистрациядин пресс-къуллугъди хабар гана.
Семинардал машгьур тренерди аялрихъ галаз кIвалахуникай, тренерар аялрив дуьз эгечIуникай ва санлай тренердихъ хьун лазим тир важиблу ерийрикай суьгьбетна.
Чингиз Абдулмежидова анал СтIал Сулейманан районда спортдал машгъул жезвай аялар расалмиш жезвай четин месэлаяр къарагъарна, кьилди къачуртIа, алай аямдин материально-технический база тахьуникай, гьакIни гележегда районда футбол вилик тухуникай лагьана.
Чаз малум хьайивал, Къурбан Бердыева мукьвал вахтара СтIал Сулейманан райондиз финин къарар кьабулнава.
«Динамо» ФК-дин кьилин тренер регионда санлай футбол вилик тухунин къайгъуйрив жавабдарвилелди эгечIнавайди кьатIуз хьун четин туш. И кар алатай гьафтеда Махачкъалада, Приморский мугьманханада, цIийи тренерди республикадин футболдин рекьяй пешекаррихъ, кьилин гьисабдай яз «Динамо» ва Маркарован (Дагъустандин образованидинни илимдин министерстводин РДЮСШ) школайрин аялрин тренеррихъ галаз кьиле тухвай семинардини субутзава. Анал Къурбан Бекиевич эвелни-эвел аялрихъ галаз кIвалахзавай тренеррихъ хьун лазим тир важиблу еридикай — къилихдикай рахана.
— Къилих авачирла, неинки футболист, гьакI тренерни жедач. Дагъустанда и жигьетдай четин месэла авач, гьикI хьи, ина вири викIегь къилихралди тафаватлу жезва. Им кьилди са миллетдин кьетIенвал туш, санлай региондин вири миллетрин векилрихъ ава, — разивилелди къейдна Къ.Бердыева.
Кьилин тренердин гафаралди, футбол къугъунал гьалтайла, Россиядихъ, иллаки кьиблепатан регионрихъ галаз, Испаниядин тегьер (модель) кьазва. Ада вичиз ганвай квартирадин пенжеррай «Динамо» школадин аялар къугъвазвай тегьердиз килигдай мумкинвал авайдакай лагьана.
— Авай кьван бажарагълу аялар акурла, зи рикI шад жезва! – вичин разивал къалурна ада. Гьа са вахтунда ада, аялрин тренерри ахъайзавай гъалатIар акурла, вичин кьарай квахьзавайдини къейдна. Идахъ галаз сад хьиз, ада аялри чпин гьар са вердишвал дуьздаказ мягькемарунин важиблувилел тренеррин фикир кIевелай желбна. Аялар футбол хъсандиз къугъун тренеррилайни пара аслу тирдакай лагьана.
Семинардин сергьятра аваз, Къ.Бердыев пешекарар патал хийирлу хейлин маса месэлайрални акъвазна. Кьвед лагьай паюна ада тренерриз-муаллимриз футболдин майдандал тайин мисалралди абуру кьилин гьисабдай рехъ гузвай гъалатIар къалурна.
— За мад сеферда тикрарзава: Дагъустанда бажарагълу аялар гзаф ава. Чи вилик кьве месэла ква: сад лагьайди — абурун бажарагъдиз кьецI тагун, кьвед лагьайдини — абуруз куьмек гун, — къейдна мадни «Динамодин» кьилин тренерди.
Регина Семедова
