РД-дин образованидин ва илимдин министерстводи хабар гузвайвал, Дагъус­тандин педагогривай Вирироссиядин «Му­аллимрин виридалайни хъсан сихил» конкурсда иштиракиз жеда. Конкурс­ кьве паюникай  ва пуд номинациядикай ибарат я.

«Гележегдин фундамент» номина­ция­да­ иштиракзавай хизандин педагогвилин умуми тежриба 50 йисалай 150 йисал кьван хьун лазим я. «Хьуниз гьевес ава» номи­нация умуми тежриба 151-300 йисаз барабар ва «Асирдай-асирдиз» — 300 йисалай гзаф девирдин тежриба авай муаллимар патал я.

Хкядай паюнин сергьятра аваз конкурс­дин иштиракчийри сихилдин муаллимрин кьилдин ва я дестедин шикилар, гьакIни хизандин кеспидикай  ва тухумдин вири муаллимрин умуми тежрибадикай, педагогрин не­­силрин кьадардикай, абурун агалкьун­рикай ва пишкешрикай суьгьбетзавай видеовизитка галкIурнавай арза рекье тун лазим я.

Комиссияди очный паюна иштиракдай ихтияр гудай 30-далай гзаф тушиз  тухумар хкяда. Абуру 9-12-октябрдиз Уфада кьиле­ фидай 3-паюна иштиракда. Эхиримжи паю­на абуру чпин сихилдикай суьгьбетда­, мектебра кIелзавай аялриз «Важиблу мес­э­лайрикай суьгьбетар» тарс кьиле тухуда ва Уфадин психологиядинни педагогикадин классра авай аялриз  чпин регионрин  зурба муаллимрикай ва насигьатчийрикай  лекцияр кIелда.

Конкурсда иштиракун патал арзаяр 15-сентябрдалди электронный почтадай — ped.dynasty@bspu.ru – кьабулда.

Чи мухбир