Чна виликамаз хабар гайивал, 12-августдиз Кьурагьрин хуьруьн стадиондал, виликан йисара хьиз, цIини спортдин милли 7 жуьредай кьиле фейи акъажунра республикадин жуьреба-жуьре пипIерай тир 250-далай виниз ксари чпин устадвал къалурна. Спортдин серенжемдин кьилин тешкилатчияр райадминистрациядин физический культурадин, спортдин ва жегьилрин крарин рекьяй отдел, райондин диндин идара (духовенство) ва эцигунардай материалрин «Араба» тIвар алай туьквенар тир. Идакай чаз райадминистрациядин пресс-къуллугъди хабар гана.
Акъажунар спортдин вири жуьрейрай, иллаки цIил ялунай, къизгъиндаказ ва итижлудаказ кьиле фена. ИкI, цIил ялунай командайрин арада (рикIел хкин: спортдин жуьрейрикай чна виликан нумрада гегьеншдаказ хабар ганва) хьайи акъажунра армспортдай дуьньядин 3 сеферда чемпион Рамидин Къазимегьамедов кьиле авай ЦIийи Макьарин хуьруьн дуствилин команда 1-чкадиз лайихлу хьана. Кьурагьвийри — 2 ва кьепIирвийрини 3-чкаяр кьуна.
Пар гваз чукурунай ва армспортдай Мегьамедвели Халикьов (Кьурагь) гъалиб хьана. Штанга хкажунай кьурагьви Эдгар Алибеговахъ галаз къведайди хьанач. 2000 метрдиз чукурунай Жамал Саркарова (Усугъчай) гъалибвал къазанмишна. ЧIемерукрай лишанар ягъунай Мегьарамдхуьряй тир Гьажимугьаммад Гьажимегьамедова виридалайни еке устадвал къалурна. Турникдал чене акъудунай Ислам Абдулазизов (Кьурагь) гъалиб хьана.
Акъажунрин тешкилатчийри спортда къазанмишнавай агалкьунрай Кьурагьай тир Зейнал Бабаевни пулдин пишкеш гуналди къейдна.
Вичин ери-бине Усугъай тир чи ватанэгьли, Азов шегьерда «Рыбхоз Рыбак Приазовья» ООО-дин учредитель ва генеральный директор Аслан Юсупован патай 20 агъзур манатдин кьадарда аваз махсус пишкешдиз армрестлингдай Россиядин чемпион Мегьамедвели Халикьовни лайихлу хьана.
Гаф кватай чкадал мадни алава хъийин: Аслан Таибовича, кIвалахдин везифаяр кьилиз акъуддайла, 1999-йисуз международный террористрин гъилелай телеф хьайи ОМОН-дин капитан Закир Султанован экуь къаматдиз бахшна, гьар йисуз футболдай кьиле тухузвай турнирдин спонсорвални ийизва. И кардай адаз районэгьлийри сагърай лугьузва.
Къейд ийин хьи, Кьурагьрин къугъунра иштиракчийрин ва мугьманрин арада машгьур спортсменарни тIимил авачир. Райондин диндин идарадин векилри абур патал тIямлу аш ва чаяр гьазурнавай.
Эхирдай, адет хьанвайвал, гъалибчийрив шад гьалара шабагьар вахкана, вирида санал шикилар яна.
Рагнеда Рамалданова
