И мукьвара Туьркиядин меркез Стамбул шегьерда 17 йисал къведалди яшда авай жегьилрин арада азаддаказ кьуршахар кьунай дуьньядин кIвенкIвечивал патал акъажунар кьиле фена. Ана чи ватанэгьли Рагьман Малагьмедов 110 кг-дал къведалди заланвал авайбурун арада буьруьнждин медалдиз лайихлу хьана.
Гьайиф хьи, чи спортсменриз Россиядин пайдах хкаждай – уьлкведин хкянавай командадик кваз иштиракдай — ихтияр авач. МОК-ди (Международный Олимпийский Комитет) дуьньядин спортдин кесерлу майданра РФ-дин ва Белоруссиядин спортсменриз анжах бейтереф кьилдин атлетар (AIN) яз иштиракдай мумкинвал ганва. Санлай къачурла, чи уьлкведай тир спортсменри Стамбулда 7 медаль къазанмишна. Гьа гьисабдай яз, 80 кг-дин заланвал авайбурун арада къазанмишай къизилдин тек са медалдин сагьибни дагъустанви Мегьамед Идрисов я.
Чна виликамаз хабар гайивал, нубатдин кесерлу акъажунра иштиракун патал Р.Малагьмедова цIи СКФО-дин кIвенкIвечивилин (Чечня, Грозный шегьер), Россиядин чемпионвилин (Москвадин область, Нарофоминск шегьер) тIварар къазанмишнай.
ИкI, Стамбулда кьве бягьс инанмишвилелди ва вахт амаз гъалибвал къазанмишуналди акьалтIарай чи ватанэгьли, гьайиф хьи, ярумчух финалда Къазахстандай тир спортсмен Едиге Кассимбегаз кумукьна. Гуьгъуьнлай адаз вичин устадвал вини дережада аваз къалурдай мумкинвал хъхьана. Буьруьнждин медаль патал бягьсина Венгриядай тир Балаш Чипсек Рагьман Малагьмедоваз 10:0 гьисабдалди кумукьна.
РикIел хкин: вичин ери-бине Кьурагьай тир Р.Малагьмедов Махачкъалада дидедиз хьана. Ина Олимпиададин резервдин 3-нумрадин спортшколада тренер Гьасан Абдулбасирован гъилик вичин устадвал хкажзава.
Рагнеда Рамалданова
