Сагъламвилиз зарар гунай
Алай йисан 10-августдиз Дербент шегьердин полициядин дежурный частунив 14 йисан яшда авай, 9-классда кIелзавай чкадин агьалиди арадал атай къалмакъалдин вахтунда 56 йисан яшда авай шегьерэгьлидал чукIулдалди хер авуна лагьай хабар агакьна. Идакай РД-дин МВД-дин пресс-къуллугъди хабар гузва.
Гьалар чирун патал агьвалатдин иштиракчияр полициядин отделдиз хкана. Малум хьайивал, шегьерда сейр ийидайла, дустар мехъерар кьиле физвай залдал ацалтна. Абурун кьилиз таниш тушир мехъерик кеф хкуддай фикир атана. Амма дараматдин администраторди (дишегьлиди) шад мярекатдик чара жегьилар ахъайнач. Къенез гьахьиз кIан хьайи вахтунда жегьилри администратордиз нагьакьан гафарни лагьана. Гьарай-эвердин ванцел атай итимди жегьилриз туьгьмет авуна. И макъамда жегьилди жибиндай чукIул акъудна, адавди итим яна.
И делилдай суд-дуван авун патал материал кIватIнава.
Мефедрон жагъана
Дагъустандин МВД-дин УКОН-дин къуллугъчийриз, «Звезда Каспия-2023» серенжем кьиле тухудайла, Махачкъала шегьердин Булачан куьчеда 24 йисан яшда авай чкадин агьалидивай порошок хьтин затI квай гъвечIи багъламаяр жагъана. Идакай МВД-дин пресс-къуллугъди хабар гузва.
Ахтармишунрин нетижайри къалурайвал, агьалидивай вахчурди 6 граммдин заланвал авай мефедрон (30 доза) тир. Тайинарнавайвал, полициядин отделдив агакьарнавай къадагъалу затI жегьилди вичи маса хгун патал интернетдай маса къачунвай. Амма «алвердин» эхир пашманди хьана.
Тахсиркарвилин лишанриз килигна, РФ-дин УК-дин 228.1-статьядай уголовный дело къарагъарнава.
Чи мухбир
