И йикъара лезги жемят, чи меденият, чIал патал лишанлу кар хьанва: алим, машгьур ватанэгьли Мегьамед Гьажиеван 125 йисан юбилейдиз бахшна, са шумуд несилди ишлемишай ва гилани гъилера авай урус чIаланни лезги чIалан надир гафарган, тикрар хъувуна, хъсан ери аваз, мад сеферда чапдай акъуднава.
И гзаф важиблу кар патал герек тир пулдин такьатар чара авурди мергьяматлувилин къанунралди яшамиш жезвай лезги халкьдин баркаллу, жумарт хва Фатуллаев Шарафуддин я. Гафарган мад сеферда акъуд хъувуник гьакI «Лезги газетдин» редакцияди ва Дагъустандин халкьдин шаир, СтIал Сулейманан райондин культурадин управленидин начальник Майрудин Бабахановани къуьн кутуна.
Гафарган районриз пайда. Махачкъала шегьерэгьлийривай лагьайтIа, ам, «Мавел» ООО-диз атана, пулсуз къачуз жеда (О.Кошевоян куьче, авай 42«а» дарамат).
Баркалла, аферин чи камаллу, къанажагълу, жумарт рухвайриз!
Максим Алимов
