Алатай гьафтеда кьиле вице-премьер Нариман Абдулмуталибов авай гьукуматдин делегация СтIал Сулейманан райондиз кIвалахдин рекьяй мугьманвилиз фена. Делегациядик РД-дин хуьруьн майишатдин ва недай суьрсетдин министр Мухтарбий Аджеков, РД-дин чилеринни эменнидин алакъайрин министерстводин, республикадин ветеринариядин къуллугъдин пешекарар квай.
Республикадин къурулушрин векилар СтIал Сулейманан райондин кьилин везифаяр вахтуналди тамамарзавай Лацис Оружев ва райадминистрациядин управленийрин пешекарарни галаз «АлиЯк» ООО-дин агромайданрал, кьилди къачуртIа, Кьулан СтIалрин хуьруьн майдандал алай некIединни метягьдин фермадал фена. Ина 1000 гектардилай виниз майдандал, алай аямдин виниз тир технологияр ишлемишуналди, эко-жуьредин якIун ва некIедин суьрсетар гьазурзава.
Къенин юкъуз ина ири карч алай гьайванрин кьадар 800-даз, куьлуь карч алай гьайванрин – 1469-даз ва балкIанрин кьадар 100-даз барабар я. СтIал Сулейманан райондин дагълух мулкара агрокарханади 700 як (гамишдин жинсиникай тир, къалин яргъи чIар, яргъи крчар алай мал) хуьзва.
«АлиЯк» ООО-ди кьилиз акъудзавай инновацийрал бинеламиш тир некIединни метягьдин ферма арадал гъуниз талукь инвестицийрин проектдин сергьятра аваз малар тукIвадай ва якни нек гьялдай цехар арадал гъун, гьакIни некIединни метягьдин комплексар эцигун, цIийикIа ва алай аямдин истемишунрив кьадайвал туькIуьр хъувун фикирда ава. Ина гьакIни кIвалахдин цIийи чкаяр арадал гъида. Проект республикадин малдарвилин хиле виридалайни чIехибурукай сад хьун лазим я.
РД-дин хуьруьн майишатдин ва недай суьрсетдин министерстводи ахтармишунар кьиле тухванва ва, республикадин «Хуьруьн майишат виликди тухун ва хуьруьн майишатдин суьрсетдин, хаммалдин ва недай шейэрин базарар гуьзчивилик кваз хуьн» госпрограммадин сергьятра аваз, алай йисуз агрохолдингдиз государстводин патай гудай куьмекдин кьадар тайинарнава.
Инвестордиз алава чилерин участокар инвестпроектдин майданрик кутун патал куьмек лазим я. И месэлайриз РД-дин чилерин ва эменнидин алакъайрай министерство, гьакIни СтIал Сулейманан, Кьурагь, Агъул, Хив районрин администрацияр килигзава. Инвестмайданриз килигайдалай кьулухъ Нариман Абдулмуталибован регьбервилик кваз совещание кьиле фена. Анал, талукь тир вири идарайрин ва карханайрин векилрин иштираквал аваз, инвестпроектдиз куьмек гудай серенжемрикай ва абур кьилиз акъуддай «Рекьерин карта» тамамарзавай гьалдикай, кIвалахда гьалтзавай четинвилерикай рахана.
Чи мухбир
