«МПС»-дикай «РЖД» хъхьана цlи 20 йис жезва. Алай вахтунда и тешкилатда 700 агъзурдалай виниз къуллугъчийри кlвалахзава. Урусатдин ракьун-рекьерин яргъивал, санлай къачурла, 86 агъзур километрдилайни виниз я. Махачкъаладин регионда (Дагъустан, Калмыкияни кваз) кардик квай вири ракьун рекьерин яргъивал 600 километрдилай виниз я.
Гьар сана ракьун рекьерал вишералди кlвалахзавай чи ватанэгьлийрик жуьрэтлу рухваярни ква. Расулов Чайдабег гьа ихьтинбурукай сад я.
Саидхуьруьн эгьли Чайдабег 1975-йисуз 8-класс куьтягьайдалай кьулухъ Орджоникидзе (гилан Владикавказ) шегьердин ракьун рекьерин техникумдик экечlна, 4 йисалай анаг акьалтlарна. Ахпа Москвадин ракьун рекьерин институтдик экечlна. Вад йисалай жегьил инженер Дербентдиз хтана, ракьун рекьерин станциядал кlвалахал акъвазна. Сифте тежриба къачун патал парар чlугвадай поездар кьабулдай паркунин, ахпа вири станциядин дежурныйвиле кlвалахна. 1994-йисалай ам Самур станциядин начальник хьана. Са кьуд йисалай Чайдабег Расулов Белиж станциядин начальниквиле тайинарна. 1999-йисуз Дербент станциядин начальникдин куьмекчи хьана. Са йисалай Мамедкъала станциядин начальниквиле кlвалахна. Гила кьве варз кьван я ам лайихлу пенсиядиз экъечlна.
Чайдабег Рамазановичан гьакъисагъ зегьмет РЖД-дин патай тир гьуьрметдин грамотаяр, Кеферпатан Кавказдин ракьун рекьерин начальникдин тlвар алай сят, «30 йисуз рехне квачиз ракьун-рекьерин транспортдал кlвалахунай» значок, «Гьуьрметлу железнодорожник» тlвар гуниз лайихлу хьана.
Чайдабег Рамазанович, ваз «Гьуьрметлу железнодорожник» тlвар ва ракьун рекьерин къуллугъчийрин сувар мубаракрай!
Амирхан Мегьамедшарифов,
ракьун рекьерин инженер
