И йикъара Мегьарамдхуьруьн райондин кьил Фарид Агьмедов футболдин «Леки» клубдин директор Рафик Агъамирзоевахъ ва кьилин тренер Тофик Къадимовахъ галаз гуьруьшмиш хьана. Анал клуб вилик тухунин гележегдин планар, финансрин куьмекдиз талукь месэлаярни веревирдна.
— Районда спорт, гьа гьисабдай яз футболни, вилик тухуниз чна еке фикир гузвай важиблу месэлайрик акатзава. Йисалай-суз районда футбол мадни вилик фини ва, гьелбетда, и рекьяй чи жегьилри къазанмишзавай агалкьунри чун гзаф шадарзава, — къейдна Ф.Агьмедова.
Гуьруьшдин сергьятра аваз «Леки» ФК-дин директорди 2022-йисуз футболдай итимрин арада кьиле фейи Дагъустандин чемпионатда «Леки» команда гъалиб хьунай райондин кьилив «Федерация футбола» ДРОО-дин председателдин тIварунихъай диплом вахкана, гьакIни адаз командада къугъвазвай ксарин къулар алай туп ва командадин форма багъишна.
РикIел хкин: 2022-йисуз «Леки» ФК-дикай Дагъустандин чемпион ва Кубокдин сагьиб хьанай. 2021-йисуз Ф.Агьмедован теклифдалди арадал гъанвай командадин учредитель Мегьарамдхуьруьн райондин администрация я.
Эхирдай Фарид Агьмедова гележегда мадни еке агалкьунар хьунин чими келимайрихъ галаз сад хьиз, Мегьарамдхуьруьн райондин 80 йисан юбилейдиз бахшна, хуьрерин командайрин арада футболдай кьиле тухвай райондин чемпионатда гъалиб хьайибурув шабагьар вахкана. ИкI, чемпионатдин къугъунра Гъепцегьрин хуьруьн команда 1-чкадиз лайихлу хьана. Кчун-Къазмайрин ва Къуюстанрин хуьрерин командайри 2 ва 3-чкаяр кьуна.
Чи мухбир
