Малум тирвал, лезги халкьдин векилар кьисметди дуьньядин гьар жуьредин пипIериз акъуднава. Интернет, социальный сетар себеб яз, чал яргъара авай чи ватанэгьлийрикай малуматар, делилар агакьзава.
Алай вахтунда лезгияр Европадин саки вири уьлквейра, Америкадин, гьатта Австралиядин континентдални яшамиш жезва.
Гьар гатфарихъ, чубарукар хкведайди хьиз, абурукай гзафбур рухсатрин вахтунда хайи хуьрериз хквезва, мукьвабурал кьил чIугвазва. Абурун жергедай са шумуд — РагъакIидай патан Сибирдин чилелай, Ханты-Мансийскдин автономный округдин шегьеррай хтанвай ватанэгьлийрин са десте – мукьвара Кьасумхуьруьн телевиденидин «Куьредин тавханадиз» мугьман хьана. Абурун арада ХМАО-да ФЛНКА-дин векилвалзавай чахчиви, Покачи шегьердин агьали Жалауддин Абдуразакьов, Герейханован хуьряй тир Пойково шегьерда карчивилел машгъул жезвай Лазир Тагьиров, Федоровский районда зегьмет чIугвазвай зизикви Руслан Абдулаев ва Пойководай хтанвай кьурагьви Муса Бейбалаев авай. Мугьманри чеб уьлкведин кеферпатаз акъатуникай, анра чи халкьдин баркаллу векилрихъ хьанвай агалкьунрикай, лезгийрин итижар хуьнин жигьетдай тухузвай кIвалахдикай ихтилатарна.
Малум хьайивал, алай вахтунда ХМАО-дин чилел 26 агъзур лезги яшамиш жезва. Абуру чIехи уьлкве вилик финик чпин лайихлу пай кутазва.
Гуьгъуьнлай мугьманар алай йисуз 90 йис тамам хьанвай Дагъустандин халкьдин шаир Сажидин Саидгьасановаз мугьман хьана. Райондин гьуьрметлу агъсакъалдин, машгьур шаирдин шадвилихъ а кьил авачир.
Хваш-беш, жузун-качузун авурдалай гуьгъуьниз Сажидин Саидгьасанова мугьманриз вичин яратмишунрин рекьикай, эхиримжи йисара чапдиз акъатнавай шииррикай суьгьбетна, абуруз савкьатар яз ктабар багъишна. Жаваб яз, «кеферпатанвийрин» патай Жалауддин Абдуразакьова халкьдин шаирдиз, «Муаллим» мани ягъуналди, чпин гьиссер ва гьуьрмет къалурна.
Шад суьгьбетрилай гуьгъуьниз халкьдин шаирди яргъарай хтанвай багьа мугьманар дагъвийрин адетралди рекье хтуна. Сагърай чеб, хайи чилин ва миллетдин ад хкажзавай рухваяр!
Мизамудин Магьмудов
