Дагъустан Республикадин Гьукуматдин Председатель Абдулмуслим Абдулмуслимова 5-августдиз Хунзах райондин администрацияда Дагъустандин халкьдин шаир Расул Гьамзатован 100 йисан юбилей къейд авунин мярекатриз гьазур хьунин месэлайрай совещание кьиле тухвана.
Идалай вилик министррин кабинетдин кьил, вири дуьньядиз машгьур дагъустанвидин юбилей къейд авунин сергьятра аваз, ремонтзавай ва эцигзавай са жерге объектрал фена.
Совещанида Дагъустан Республикада авай Федеральный казначействодин Управленидин кьил Абдулпатагь Амирханова, Хунзах райондин кьил Нурмегьамед Задиева, вице-премьер Муслим Телякавова, РД-дин образованидин ва илимдин министр Ягья Бучаева, РД-дин культурадин министр Зарема Бутаевади, РД-дин минэнергодин кьил Марат Шихалиева ва масабуру иштиракна.
Совещание ачухуналди, Абдулмуслим Абдулмуслимова къейд авурвал, Дагъустан зурба вакъиадив — Дагъустандин халкьдин шаир Расул Гьамзатован 100 йисан юбилей къейд авунин мярекатрив агакьзава.
«Абурукай сад, гьелбетда, шаирдин ватан тир Хунзах райондин ЦIада хуьре кьиле фида. Гьаниз килигна, алай вахтунда вилик чун вири патал гзаф важиблу месэла – шад мярекатар кьиле тухуниз гьазурвал акунин нетижаяр кьун ква. Республикадин Кьил Сергей Алимович Меликован тапшуругъдалди чун иниз са йис идалай вилик атанай ва рикIел хуьнин «Лацу дурнаяр» комплекс, адан патав фидай рекьер, яшайишдин ва культурадин ирсинин объектар авай гьал ахтармишайдалай кьулухъ гегьеншдаказ кьиле тухвай совещанидал кар алай вири месэлаяр веревирднай, гьар са рекьяй жавабдар ксар тайинарнай.
Са гьихьтин ятIани гъалатIар туькIуьр хъийидай вахт чахъ саки амач. Чна саки вири месэлаяр чкадал ахтармишна. Рехъ ганвай гъалатIрикай рахана», — ачухна совещание премьер-министрди.
Нурмегьамед Задиева райондин администрацияди ватанэгьли шаирдин юбилей къейд авунин сергьятра аваз кьиле тухванвай кIвалахдикай лагьана.
«Объектрал эцигунардайбурун бригадайрин кьадар артухарун лазим тирдан гьакъиндай премьер-министрдин гафарал зун тамамдаказ рази я. Пудратдин тешкилатдихъ галаз мукьвал тир вахтунда фикир ганвай вири гъалатIар арадай акъудда ва кIвалахдик тади кутада. Заз республикадин руководстводиз муниципалитетдиз гузвай куьмекдай чухсагъул лугьуз кIанзава. Совещанидилай кьулухъ гъиле-гъил аваз чна кIвалахдив эгечIзавай къайда ва тегьер дегишарда, вири крар вахтунда акьалтIарун патал къуватар желбда. РикIел хуьдай комплексдал мультимедиадин тадарак тайинарунихъ, Арани хуьре эцигнавай цIийи мектеб электроэнергиядалди таъминарунихъ, республикадин ва муниципальный дережадин шегьре рекьер туькIуьрунихъ ва цIийикIа туькIуьр хъувунихъ галаз алакъалу вири месэлаяр чна пландин бинедаллаз гьялзава. Куьн мад сеферда къведалди, гьалар тамамдаказ дегиш жеда, вири къейдер, насигьатар чна фикирда кьада. 20 йикъан вахтунда чна вири къайдадиз гъида. Августдин кьвед лагьай паюна вири кIвалахрин асул паяр кьилиз акъудда», — инанмишарна Задиева.
Идалай кьулухъ совещанида иштиракзавай гьар са касди и ва я маса объектдин гьазурлухвиликай чпин фикирар малумарна. Абдулмуслим Абдулмуслимова хабар гайивал, вацран эхирдай ам объектар авай гьал ахтармишун патал мад сеферда Хунзах райондиз мугьман жеда.
Чи мухбир
