РД-дин  Гьукуматдин Председателдин заместитель Нариман Абдулмуталибова СтIал Сулейманан райондин мектебрин дараматар  кIелунин  цIийи йисуз ачухун патал гьазур хьунин гьал ахтармишна.

Агъа СтIалрин, ЦIийихуьруьн ва КIвар­чагърин мектебра республикадин вице-премь­ерди, «Образованидин мектебрин къу­лурушар алай аямдин истемишунрив кьадайвал туькIуьр хъувун» госпрограммадин сергьятра аваз, бинедилай ремонт авунин кIвалахар кьиле физвай гьал ахтармишна.

Малум хьайивал, образованидин объектар кIелунин цIийи йисаз гьазур хьунин кIвалахар, санлай къачурла,  90 процентдив­ агакьдайвал тамамарнава. Кьилди къачур­тIа, ЦIийихуьруьн мектеб тамамдаказ гьазур я, Агъа СтIалрин ва  КIварчагърин мектебар — 85 процентдин.

СтIал Сулейманан райондин  кьилин везифаяр вахтуналди тамамарзавай Лацис Оружевахъ ва райадминистрациядин пешекаррихъ галаз санал Нари­ман­ Абдулмуталибов Агъа СтIал-Къазмайрин цIийи мек­­теб­дизни фена­. Къейд ийин,­ ам меценат Салман Бабаеван  ишти­раквилелди «Хуь­­рерин чка­­яр вири патарихъай виликди тухун» госпрог­раммадин сергьятра аваз эцигнава. Ина вице-премьерди  гьукуматдин ко­миссияди къалурнавай нукьсанар арадай акъудзавай ва объект ачухун патал  гьазурлухвилин гьал ахтармишна.

Агъа СтIал-Къазмайрин мектебдин директор Жабраил Асланова хабар гайивал,  нукьсанар пландин бинедаллаз арадай акъуд­за­ва.  Алай вахтунда ина михьивилерзава, мектеб ачухуниз гьазур жезва.

Жавабдар ксариз Н.Абдулмуталибова ре­монтдинни эцигунрин кIвалахрин еридал ва абур вахтунда кьилиз акъудунал гуьзчивал авун чарасуз тирдакай лагьана.

«1-сентябрдиз вири мектебар чпин уче­никар кьабулиз гьазур хьун лазим я», — къейдна ада.

Чи мухбир